Na zahrodźe dźěćaceho domu „Při baćonjacym hnězdźe“ w Myšecach je so 10. oktobra běrnjacy woheń palił. Maćerje a nanojo njejsu tuž hnydom domoj chwatali, ale su so z dźěćimi při wohenju zhromadźili. Za to mějachu dobru přičinu. Wšako wotměchu tam žnjowy dźakny swjedźeń. Za to běchu žłobikarske a pěstowarske dźěći něšto dobre k jědźi přihotowali. To wězo wšitkim derje słodźeše, wosebje dokelž běchu na čerstwym powětře. Tež ći, kotřiž běchu před něšto časom hišće w Myšecach do horta chodźili, běchu na swjedźeń přeprošeni. Woni běchu w septembrje za swój film „Dźěći w horće Myšecy“ wobydlerske myto Sakskeje w kategoriji telewizija dobyli. Na swjedźenju přepodachu połojcu mytowanskeho pjenjeza towarstwu Słónčna pruha z.t. Drježdźany. To je spěchowanski kruh za na raka schorjene dźěći a młodostnych. Zastupjerka towarstwa skupiny staršich Hornja Łužica knjeni Gnausch je so za dar 250 eurow wutrobnje dźakowała. Wjesołe popołdnjo njebě dawno hišće zakónčene. Nawječor ćehnjechu dźěći w lampionowym ćahu po wsy. Po tym sedźachu při lěhwowym wohenju abo rejwachu k hudźbje diskoteki.