Wumolujce!
´W starej Grjekskej knježeše jónu kral Midas, kiž je boha swětła Apolla chětro rozhněwał. Jako chłostanje za to je Apollo kralej dał wóslacej wuši narosć, štož toho wězo jara mjerzaše. Tohodla spyta wón njeluboznej wuši pod swojej čapku chować. Wosoł porno tomu njetrjeba so swojeju wušow dla na žadyn pad hańbować. Wšako z nimaj fantastisce słyši. Štóž wo wóslacych wušach rěči, měni jenož widźomny dźěl wucha – wuchowu mušlu. Žiwe stworjenja słyša ze swojimaj wušomaj, a tak ma wuchowa mušla nadawk, šum, haru, rěč atd. popadnyć a nutř do wucha wjesć. My čłowjekojo mamy poměrnje małej a njepohibliwej wuši, kotrejž móžemy sej w zymje tež hišće spěšnje zwozabić. Wosoł pak ma jara wulkej wuši, kotrejž stej nimale poł jeho hłowy dołhej. Swojej wuskej wuchowej mušli móže wón jednotliwje pohibować, zo by šumy popadnył (słyšał). Wuši so stajnje pohibujetej a pokazujetej, kak wažny tutón zmysł za wosoła je. Wón cyle jasnje zapřijima, zwotkel hara pochadźa. Zynk wotlěwa trjechi najprjedy lěwe wucho a hakle po tym prawe. Tak spóznawa wosoł směr žórła šuma a hary.