Krótko do hód zastupich prěni króć do wobchoda za toboły na Jerjowej 21 w Budyšinje. We woknje běch so mjenje a bóle připadnje tobołki z wobrazom serbskeho kwasa dohladała. A to mje zajimowaše. Serbski katolski kwasny por z małej skupinu přiwuznych, wšitcy w serbskej narodnej drasće, hladaše z woknom na staroměšćanski puć.

„Chcu něšto trajne tworić, ničo, štož je po jednej sezonje zabyte. Dźěłam tuž z přirodnymi materialijemi a kóžda toboła abo toša, kotruž poskiću, je unikat“, mějićelka wobchoda za kreatiwnu modu „Marlen“ Hella Schwager powěda. „Kóžda toboła něšto wo čłowjeku wupraji, kiž ju nosy. Móžeš sej po zaběrje z tematiku samo swět stawiznow, technikow šića a materiala wotkryć.“

Zetkanje z Hellu Schwager we wobchodźe nad schodami, kotrež wjedu k Michałskej cyrkwi, chowa w sebi pućowanje po nazhonjenjach a dožiwjenjach designerki za wudźěłki z kože. Swoju dźěłarnju-manufakturu ma wona w bliskich Błohašecach. Na kulojtych narodninach před lětami bě ju dźowka Marlen z wobchodom w Budyšinje překwapiła a jej tak přeće młodych lět zwoprawdźiła.