Po wšej Němskej ludźo w adwentnym času poprjančki pjeku. W druhich krajach maja zaso hinaše słódke chłóšćenki. Turrón na přikład je pralina, kotruž w Španiskej a někotrych łaćonskoameriskich krajach k hodam přihotuja. Turrón wobsteji z mjedu, cokora, bělka jejka kaž tež z praženych mandlow abo worješkow. Mjeztym pak je hižo wjele dalšich modernych wariantow praliny, a to ze wšelakimi aromami, kaž na přikład šokolody. Přidawki: 650 gramow mandlow 100 gramow židkeho mjedu 400 gramow próškoweho cokora Bělk třoch cyle čerstwych jejkow Mandle z kropom naparić. Prjedy hač kožu wotćehnješ, maš trochu čakać. Abo kupiš prosće hižo bělene mandle. W horcej pónoji je po tym trochu popražiš. Móžeš mandle tež při 200 stopnjach do pjecy sunyć. Hdyž su žołtobrune, maja prawu barbu. Nětko móžeš mandle hišće na mjeńše kuski rozkrać. Měd maš sćoplić. Za to staj šklu z mjedom do horceje wody a daj wodu zawarić, zo měd rozběži. Próškowy cokor a mandle z mjedom změšej. Bělk jejkow cyle husty zbij. Horcu mjedowu pastu kidaj kusk po kusku do bělka. Ćěsto daj po tym na pječensku papjeru, kotruž do toho z wolijom pomazaš.