Starša generacija Radworčanow wě so hišće dopomnić, zo eksistowaše w jich wsy w 1980tych lětach konspiratiwny dom statneje bjezstrašnosće. Dokładnje wšak zjawnosć ničo wo tym njewědźeše, přiwšěm wobydlerjo mjez sobu šukotachu a tukachu, zo ma stasi w jednym domje swoje hnězdo.
Třiceći lět po politiskim přewróće chcych trochu swětła do woneje ćmoweje naležnosće přinjesć a stajich tuž próstwu wo dohlad do akty wo Radworskim stasiobjekće. Na 144 stronach informowach so wo dźěławosći ministerstwa za statnu bjezstrašnosć w konspiratiwnym domje w Radworju.
W sydomdźesatych lětach minjeneho lětstotka natwari sej młoda Oswaldec swójba na ležownosći tehdyšeho Lehmannec zahrodnistwa jednoswójbny domčk w stilu bungalowa na idyliskim blečku blisko Radworskeho hrodu a parka. Bórze pak staji próstwu, zo chce z Němskeje demokratiskeje republiki do zapada wupućować. Kaž běše tehdy z wašnjom, dyrbjachu Oswaldecy do přesydlenja swój dom statej darić.
