Domowinjenjo w Trjebinje tele dny na 75lětne skutkowanje zhladuja
Poprawom chcyše 63 čłonow Trjebinskeje Domowinskeje skupiny ze swojej předsydku Angeliku Balccynej w nowej wjesnej srjedźiznje na Šusterec statoku swój 75. załoženski jubilej 30. awgusta swjatočnje woswjećić. Bohužel so tele předewzaće wuměnjenjow koronakrizy dla přewjesć njehodźi. Tohodla chcu dźěło Trjebinskich Domowinjanow tule bliže předstajić.
Domowinska skupina běše w Trjebinje wot wšeho spočatka sylny stołp we wsy. Hačrunjež je so Domowina, zwjazk serbskich towarstwow, hižo 1912 załožiła, bě so tehdy w Slepjanskim regionje na narodnym polu mało hibało. W lěće 1937 su fašisća Domowinu zakazali. Jenož dnjej po skónčenju Druheje swětoweje wójny, 10. meje 1945, Domowinu w Chrósćicach wozrodźichu.
