Park wjercha Pücklera w Mužakowje skića tójšto atrakcijow – ćim bóle wot toho časa, zo je zaso dospołnje přistupny. Wšako bě najwjetše po jendźelskim stilu wutworjene wuchodźowanišćo srjedźneje Europy po Druhej swětowej wójnje dźělene.
Nowu, do dźensnišeho wobstejacu hranicu woznamjenichu z namjeznymi stołpami podłu Nysy. A běchu časy, jako ju spóznajomnje wobrónjeni wojacy stražowachu. Wjetšej płoninje na pólskim boku spožčachu status přirodoškitneho pasma a zelenišćo přiběrajcy zarostowaše. W NDRskim dźělu so po spočatnym spjećowanju ze stron knježerstwa za zachowanje zelenišća zasadźowachu. Po politiskim přewróće počinachu park kaž tež twarjenja w nim na woběmaj bokomaj planam Pücklera wotpowědujo restawrować. W lěće 2004 přiwzachu cyłkownu ležownosć do lisćiny swětoweho namrěwstwa UNESCO.