Foće: Alfons HandrikLětsa bě to dwacety raz, zo je Smjerdźečanske Towarstwo swj. Filomeny pakćiki za nuzu tradace dźěći zběrało. W pěstowarnjach we Worklecach, Wotrowje, w Pančicach-Kukowje, Chrósćicach, Kulowje, delnich Sulšecach a na Horach kaž tež na zakładnymaj šulomaj we Worklecach a Wóslinku zeznachu předsydu towarstwa Gerata Róbla, jako je pola nich pakćiki wotewzał. Wón jim powědaše, kajke hubjene poměry knježa w maćernodźěćacymaj domomaj w Jiřetínje a Dolnim Podluží w Čěskej, ale tež w bołharskim měsće Razgradźe. Z wulkej lubosću su tuž dźěći, pak za hólca pak za holcu w jich starobje, pakćik pjelnili – husto tež ze swojej najlubšej hrajku.
Nawodnica Sulšečanskeje pěstowarnje, kotrejež nošer je Miłočanski Křesćansko-socialny kubłanski skutk, Michaela Dömmelowa praji, zo je kaž hižo minjene lěta kóžde z tamnišich 32 dźěći rjany pakćik Geratej Róblej wosobinsce dariło. Tomu bě tež druhdźe tak. Někotři su do pakćika tež swoju adresu połožili. Na te wašnje su wšak někotři w minjenych lětach přećelow w druhich krajach našli.