Na bywšim nasypje brunicoweje jamy Klěšniku mjeztym połdra lětdźesatka wino plahuja
Wjes Klěšnik (Wolkenberg) bu 1991 wudobywanja wuhla w brunicowej jamje Wjelcej-juh dla wotbagrowana. Něhdźe 170 wobydlerjow dyrbješe swoju domiznu wopušćić. Mjeztym je kónčina rekultiwowana a tam wutworjena winica po zhubjenej wsy Klěšnik pomjenowana.
Sylvia a Roland Pietzker tajku rekultiwowanu kónčinu hišće nihdźe widźałoj njejstaj. Dimensija pohórnistwoweje krajiny je njepředstajomna. Zo na tajkej suchej pódźe wino rosće ...“, so kolesowarjej z Berlina dźiwataj, zastawši před winicu Klěšnik. W lěće 1991 steješe tam hišće wjes, 172 wobydlerjow přesydli so tehdy do susodnych wsow, ale tež do Grodka a Choćebuza. Stara cyrkej z 15. lětstotka so tehdy tohorunja zhubi.
