Student hospodarskeje informatiki Syman Sćapan dźěła na wšelakore wašnje na polu digitalizacije serbskeje rěče

Hustohdy rozprawjeja w medijach wo wosobach, kotrež so zjawnje před kameru stupja, kaž smy to lětsa koronapandemije dla tež w Serbach w najwšelakorišich widejach a přinoškach dožiwili. Kohož pak wobhladowarjo při tym widźeć njemóža, je čłowjek, kiž za kameru steji a zjawne spřistupnjenje wobrazow scyła zmóžnja. Mjeno Michała Cyža, nawody Budyskeho studija Sakskeho spěchowanskeho a wupruwowanskeho kanala, je drje mnohim Serbam znate. Zo pak njemóže wón samo kóždy serbski kulturny wjeršk nahrawać a w najlěpšim padźe hišće­ jako livestream na Youtube wusyłać, tež to je wočiwidne. Zo to njedźiwajcy toho­ zwjetša wšitko derje funguje, zaleži na mjeztym derje dźěłacym teamje, kiž je w běhu lět w Serbach nastał a kotryž je mjeztym wšudźe tam pódla, hdźež dyrbja z komplikowanej techniku wobchadźeć. Jedyn čłon tohole cyłka je Syman Sćapan.