Foto: pixabay/Patty JansenTo budźe lětsa wostudły silwester doma, měnitaj Beno a Jakub. Koronawirusa dla njesmědźa ludźo swoje domy wopušćić a dyrbja sami swjećić. A poprawom měještaj bratraj hižo tójšto šibałych idejow, kak móhli wječor přežiwić, k čemuž słušachu wězo praskotaki. Nan a mać staj tež hižo rozmyslowałoj, kak posledni dźeń lěta z hólcomaj wuhotuja. ,,Zawěsće dyrbimy zhromadnje kołbaski jěsć a na šlagrowy program słuchać. Wšako je nan ekstra wulki nowy telewizor kupił“, so Beno trochu hněwa. Nan pak měješe skradźu hinaše plany. Mjeztym zo mać dobru stwu z girlandami pyši, sedźi wón před wulkej wobrazowku a spyta techniske problemy rozrisać. „Móžemoj ći někak pomhać“, so hólcaj prašataj. „Mam překwapjenku“, nan praji. „Dočakajtaj, to budźe najdlěša party, kotruž staj hdy dožiwiłoj. Chcemy hižo dopołdnja w jědnaćich započeć.“ „Tak zahe? Dyrbimoj to potom wječor hižo we wosmich do łoža?“, chce Jakub wědźeć. „Ně, silwester je dźě najwjetša party po cyłym swěće. Dźakowano časowym conam móžemy cyły dźeń swjećić.