Předewzaće wuměłskeho rjemjesła RATAGS nadźija so nětko na jutry

W Langenwolmsdorfskim zawodźe RATAGS tele dny z połnej paru dźě­ła­ja, tola jenož w běrowach. Kaž stajnje spočatk lěta je inwentura. „Tež w časach pandemije ma so lěto dokładnje wotličić“, wuswětla Johannes Dose. Wón je w znatym předewzaću, kotrež ma tež wobchod na Budyskej Bohatej, za grafiku, rozšěrjenje a medijowe dźěło zamołwity.

Druhi lockdown mocy rubi

Inwentura wutworja trochu normality w nic runjewon normalnych časach. Tež w firmje wuměłskeho rjemjesła RATAGS-Heipro tzwr wojuja ze sćěhami pandemije a z njej zwisowacymi wobmjezowanjemi. „Prěni lockdown smy hišće derje přetrali“, zhladuje Johannes Dose na lońši měrc a apryl. Tuchwilny lockdown pak „mocy rubi, dokelž so do njeskónčnosće ćehnje.“