Z Njebjelčic pochadźaca Yvonne Tatzelowa sej ze swójskim wobchodom za njewjesćinsku modu són spjelniła
W dojutrownym času móžachu pasanća we wobchodźe za njewjesćinsku modu Yvonne Tatzeloweje „Ateljej njebjesa“ na Budyskej Seminarskej figurinu w družčej drasće wobdźiwać. Wonu drastu bě mějićelka wobchoda jako dźěćo sama k wosebitym přiležnosćam zhotowana. Byrnjež z ryzy serbskeje swójby njepochadźała, je wona ze serbskosću a z nałožkami a tradicijemi Serbow wobdata wotrostła. Wowka da jej družču narodnu drastu šić. Yvonne Tatzelowa, kotraž je so we Worklecach narodźiła a w Njebjelčicach wotrostła, je sej ju na Bože ćěło kaž tež na putnikowanja do Róžanta woblěkała.
Dwurěčnosć dźěćom lěpšina
Ze wšědneho dźěła w ateljeju Yvonne Tatzelowa wě, zo su so ryzy serbske kwasy skerje ze žadnostku stali. Nic cyle tak njewšědne pak mjeztym je, zo ma njewjesta tradicionalny běły šat, jeje młodźi žónscy hosćo pak jako družki w swojej drasće přichadźeja.