Incidencna hódnota koronain­fek­cijow je na zbožo skónčnje niša. To móhło na tym zaležeć, zo so dale a wjac ludźi šćěpić da. Dotal dyrbješe so wěsty slěd při šćě­pjenju dodźeržeć, štož pak je nětko zběhnjene. Potaj­kim maja tež młodźi ludźo bórze móžnosć so šćěpić dać. Tola što po­prawom naši młodostni k šćěpjenju praja? Halina Hejduškec je so něko­trych za tym prašała, hač bychu šansu na šćěpjenje wužili, abo hač so móž­nych wuskutkow boja?

Adrian Mička z Bronja: Mam šćěpje­nje za jara dobre, dokelž so tak pandemiji zadźěwa. Hdyž pak hladam na to, zo so šćěpjenja hewak přez wjacore lěta wuwiwaja a nětko w krótkim času nałožuja, mó­žu zrozumić, hdyž někotři nastupajo toho kritisce mysla abo so někajkich sćě­how boja. Wosobinsce mam wězo wob­myslenja, dokelž hišće telko studijow wo tym njedawa, bych pak rjekł, zo móžemy tomu dowěrić. Ja bych so šćěpić dał, hdyž tu móžnosć k tomu mam. Za mje přewahuje přičina, zo nješkitam tak jenož sebje ­samoho, ale tež druhich. Nimo toho faluje mi wězo tež normalny wšědny dźeń, kaž bě wón do pandemije, a tón móžemy sebi nadźijomnje bórze zaso wróćo zdobyć.