Tež we Wudworju su lětsa mejemjetanje přewjedli. Mejski kral Jakub měješe tónraz dwě mejskej kralownje, Halinu a Helenu. Foto: Eckhard Kliemann
Fota: Viktoria Pašcyna (4)Wotsrjedź meje smědźa wšitke dźěći Serbskeje pěsto­warnje „Jan Radyserb-Wjela“ w Budyšinje zaso tam chodźić. Na to su so wězo jara wjeselili, wosebje předšulske. Ručež běchu wone do pěsto­war­nje přišli, su so na swje­dźeń mejemjetanja přiho­towali. A wšitcy smě­dźachu so na programje wobdźělić. Holcy skupiny běchu najbóle rozbudźene, do­kelž wědźa­chu, zo budu pyšnu serbsku drastu zhotowane. Program smy štwórtk, dźeń do wulkeho swje­dźenja, hišće zwučowali. Pjatk, 20. meje, běše potom tak daloko. Holcy běchu wosebje rjane w drasće delnjołužiskich, katol­skich a Wojerowskich Ser­bowkow, a hólcy běchu w rjanych běłych košlach. Spěwachmy a re­jowachmy wokoło našeje meje a před­­njesech­my tež basnje. Ban­towa reja wokoło meje so wšitkim jara lubješe. Po spě­wanju meja padny, a třo hólcy předšul­skeje skupiny běža­chu tak spěš­nje, kaž móžachu, za hałžku wjerška.