Přewšo rjane dožiwjenje mějachu dźěći Kulowskeje pěstowarnje swj. Marije posledni pjatk minjeneho měsaca. Prěni raz wěnowachu so tam rjanemu nałožkej a su meju mjetali.
Serbske dźěći jěžikoweje skupiny běchu so ze swojej kubłarku Mandy Brösanowej derje přihotowali. Wšitke pjatnaće dźěći bě swjedźensce zwoblěkanych.
K zaćahej spěwachu „Štóž je rady wjesoły, pola nas je witany“. Prjedy hač meja padny, pokaza wosom porow – kubłarka bě sobu zapřijata – wokoło meje rejujo někotre nazwučowane rejki.
