Jutrowničku 1972, bě to 2. apryla a wot ranja přez cyły dźeń bě zymne a pancate wjedro, je w Ralbičanskim křižerskim procesionje młody pachoł sobu jěchał, kotryž z mócnym hłosom jutrowne kěrluše zanošowaše. Křižer ze zelenym wěnčkom bě 14lětny Koslowčan Jurij Lebza, kotryž jěchaše w porje z nazhonitym křižerjom, ze swojim nanom. Tehdy bě widźeć, zo ma młodźenc ke konjej dobry poćah a wě z nim wobchadźeć. Sam wo sebi praji, zo bu jemu křižerstwo „do kolebki połožene“. Hižo jeho dźěd je poselstwo zrowastanjenja do Kulowa ­njesł. Wot njeho ma tež hišće křižerske knižki z lěta 1930, kotrež sej jako drohoćinku chowa. Daloki puć křižerjow do Kulowa wšak bě Jurjej derje znaty. Runja druhim je jako šulski hólčec stajnje křižerjam napřećo šoł a z 13 lětami je jich po wužohnowanju w Ralbicach hač do Kulowa přewodźał. Za dźěći bě to stajnje rjane dožiwjenje, hdyž smědźachu so druhdy zwonka wjeski na konja sydnyć.