Projekt Rěčna krajina dokumentuje slepjanšćinu w cyłej swojej mnohotnosći
Slepjanska wosada je přez wosebitu rěčnu mnohotnosć hač do dźensnišeho charakterizowana. „Slepjanska serbšćina je jónkrótny charakteristikum. Na to móže region hordy być“, podšmórny Juliana Kaulfürstowa, wědomostna sobudźěłaćerka Serbskeho instituta njedawno w swojim přednošku „Rěčna krajina Slěpe-Schleife-Slepo“ w Slepjanskim Serbskim kulturnym centrumje. Bě to jedyn z dweju přednoškow składnostnje jubileja „750 lět Slepo“.