Koparska sezona je so hakle před tydźenjomaj zahajiła a hižo wotměchu na amaterskej runinje tójšto derbyjow z wobdźělenjom serbskich mustwow.
Na prěnim hrajnym dnju wočakowachu Njebjelčenjo we wokrjesnej lize zestupnika z Pančic-Kukowa. Serbski duel skónči so ze sprawnym remisom 1:1. Na samsnym dnju hrajachu klasu niže rezerwje z Njebjelčic a Ralbic přećiwo druhimaj mustwomaj z Radworja a Wulkeje Dubrawy. Hrajne zjednoćenstwo z Njebjelčic a Ralbic so w hrě z 3:1 přesadźi.
Zašły tydźeń witaše postupnik z Radworja stareho zajaca wokrjesneje wyšeje ligi z Ralbic w swójskim stadionje. Po wurunanym prěnim połčasu pak pokazachu Sokoljo cyłu swoju rutinu a dobychu w Radworju jasnje ze 4:0.
W krajnej klasy startowaše team z Chrósćic jara derje do noweje sezony a doby při tym mjez druhim tež hižo derby přećiwo Rakečanskemu sportowemu towarstwu. Dešća dla pak dyrbješe zašły kónc tydźenja tež hižo jedna hra wupadnyć.
W přichodnych tydźenjach so dale pokaza, dokal puć wšěch serbskich koparskich towarstwow powjedźe, wšako steji nimale kóždy kónc tydźenja dalša hra na planje.
