Na serbskich slědach po cyrkwinskej wsy we wuchodnych Serbach

Hromadźe z dalšimi wsami w Budyskim kraju swjeći Hrodźišćo pola Wósporka lětsa 800. róčnicu swojeho prěnjeho naspomnjenja. Swoje mjeno ma wot starodawneho hrodźišća, kotrež so při hrodźe na juhowuchodnej kromje wsy wysoko nad skalnej dolinu rěčki Lubaty pozběhuje. Serbsce rěčeć dźensa hižo z nikim we wsy njemóžeš, tola serbskich slědow móžeš sej tam tójšto wotkryć.

Cyrkej a kěrchow

Na wyšinje stejaca Hrodźišćanska cyrkej hlada daloko do kraja. Natwarjena w lěće 1902, dopominaja w njej wjacore serbske a dwurěčne napisy na tehdyšu narodnu zestawu wosady. W zachodźe wita kemšerjow hrono „My chcyli radźi Jezusa wohladać.“, nad wołtarnišćom steji započatk hodowneho poselstwa „Česć budź Bohu we wysokosći!“, a na wołtarju pod wobrazom křižowaneho Chrystusa „Hlaj, to je Bože jehnjo, kotrež swěta hrěchi njese“.