Sym Jadwiga a dźěłach lěto w Grjekskej. Loni kónc měrca powabich so pola organizacije DJiA (Diakonisches Jahr im Ausland) za swobodne socialne lěto. Poprawom chcych hnydom po maturje studować, ale znateje situacije dla chcych z tym hišće čakać. Rozsudźich so poměrnje pozdźe za swobodne socialne lěto, tohodla njemějach wjele wuběra. Běch zbožowna, zo mje diakonija přiwza. Při powabjenju dyrbjach podać, z kim chcu rady dźěłać – hač z dźěćimi, staršimi ludźimi, młodostnymi, w cyrkwi abo w přirodnym wobłuku. Poprawom běch za wšitko wotewrjena. Na kóncu móžach so mjez Ukrainu a Grjekskej rozsudźić. Po 10. lětniku pobych jedne šulske lěto w Litawskej, tohodla běch hižo tróšku wuchodny dźěl Europy zeznała. Najebać ­to rozsudźich so za Grjeksku – do­kładnje za kupu Rhodos. Mějach hnydom rozmołwu z organizatorku na kupje Rhodos.