Tři dny wuměłstwa we Wojerecach swjećili – zboka mainstreama a folklory, ale nic zwonka łužiskich tradicijow
Hudźba, tworjace wuměłstwo, performance, awdijo-wizuelne instalacije a filmowe předstajenja kaž tež dźěłarnički, wiki a nic naposledk dalše zetkanje (sub)kulturnych akterow z cyłeje Łužicy „SEŚ“ – druhi festiwal SubSorb je wopytowarjam wospjet dosć reprezentatiwny dohlad do tudyšeho skutkowanja zboka mainstreama a folklory sposrědkował a njemało z nich zahorił. Wulkej wjerškaj běštej tónraz bjezdwědla hudźbneho razu. Projekt Serbsko-waliziske přećelstwo – Cyfeillgarwcg cymraeg a sorbian předstaji na małym jewišću Wojerowskeje Kulturneje fabriki nimo znatych spěwow někotre cyle nowe titule, kotrež je cyłk w tydźenju do festiwala skomponował a nahrawał. Wjacore z nich so na ludowu hudźbu złožuja, při čimž twori serbska melodija fundament za waliziski tekst a nawopak. Stilistiski spektrum wopřijima hiphop runje tak kaž indie rock, electro, šanson a punk.
