Prěni dobry zaćišć Kathariny Dickopf so tež po prěnim lěće změnił njeje

27lětna rodźena Berlinjanka Katharina Dickopf je dirigentka orchestra Serbskeho ludoweho ansambla (SLA) w Budyšinje. Wotrostła je wona w Heidelbergu. Po złoženju matury je na Wysokej šuli za hudźbu Carl Maria von Weber­ w Drježdźanach dirigentstwo studowała a je hnydom po tym, loni w awgusće­, dźěłowy poskitk w SLA přiwzała. Milan Pawlik je so z njej rozmołwjał.

Móžeće nam rjec, kak sće sej swoju lubosć k hudźbje wotkryła?

K. Dickopf: Dopominam so na rjane wokomiki z hudźbu w zažnym dźěćatstwje ... kak je mać na gitarje hrała a ze sotru smój k tomu rejowałoj. Dopominam so na tačele Mozarta, kotrež sym jako pjećlětna holca lubowała. Operu „Die Zauberflöte“ sym pospochi słuchała. Tuta hudźba je mje fascinowała a chcych tehdy na kóždy pad klawěr hrać nawuknyć. To pak su mi hakle w šulskim času dowolili. Najprjedy dyrbjach so z pišćałku spokojić. Jako běch 13 lět, sym so tež jara za husle horiła. Hudźbnu šulu na tutym instrumenće pak sym po chwili spušćiła a so na wukmanjenje na klawěrje koncentrowała.