Serbska ludowa rada před 100 lětami wutworjena – wot załoženja přez reorganizaciju hač k rozwjazanju

Předchadnik: Serbski narodny wuběrk

Po zakónčenju suroweje Prěnjeje swětoweje wójny nasta we Łužicy nadźija, zo přichod Serbam lěpše wuměnjenja za hajenje jich rěče a kultury přinjese. Ale Serbja dyrbjachu swojich načolnikow ze spara a k narodnemu hibanju wubudźić. Serbske Nowiny wozjewichu dnja 30. nowembra 1920 rozprawu sekretara Serbskeho narodneho wuběrka. Prof. Bryl wopisowaše před złoženjom swojeje funkcije nastaće a aktiwity Serbskeho narodneho wuběrka a Serbskeho zwjazka. Wón pisa: „Bart wza wjednistwo na so a přez jeho iniciatiwu załoži so 13. nowembra 1918 Serbski narodny wuběrk. Poněčim wutwori so po woběmaj Łužicomaj Serbski Zwjazk“. Prěni raz wotměwachu so w Serbach serbske ludowe zhromadźizny z wulkim wothłosom a samo z euforiju w ludnosći. Bryl mjenowaše serbske hibanje w lětach 1918 do 1920 „rewoluciju swojeho razu: kulturne wojowanje Serbow za narodne wobstaće. Njekrawna duchowna wójna to běše.“