Na kulturnym polu nazhonjamy w Serbach wjele, štož je nam blisko a lubo. Ale tež to, štož je daloko preč, zamóže nas jimać a nam nowe impulsy dawać. Wo tym budźe so w tutej rubrice pisać.

W tutych dnjach myslu husćišo na njewšědnu wosobinsku róčnicu. Spominam na nju bóle zaćichim, hačrunjež sym sej wěsta, zo su přede mnu tež druzy, młódši, hižo na nju myslili a po mni budu to dalši, starši ludźo, činić. Kóždy, kóžda ma swój wosebity datum. Wo čo dźe? Spočatk februara budźe tomu 35 lět, štyri měsacy a něšto dnjow, zo sym so staćanka Zwjazkoweje republiki Němska stała. A runje tak dołho běch do toho w Němskej demokratiskej republice žiwa. Z tajkej cezuru njejsym ženje ličiła. Je to składnosć za bilancu? Haj, za mnje na kóždy pad.