Rozmołwa z reporterom Zbigniewom Rokitom wo hornjošleskej identiće, wo sporće a koparskich mišterstwach mjeńšinow
Pólski … pardon, šleski nowinar a reporter Zbigniew Rokita je w Pólskej znaty awtor knihow wo Šleskej, kotryž čitarjam wujasnjeć spyta, zo so w Pólskej aktualnje hornjošleska rewolucija identity wotměwa. Loni su Rokitu tež Češa zeznali, wšako stej w čěskim přełožku dwě jeho knize wušłoj. Jedna je wo nowych pólskich powójnskich teritorijach, štož je tež wuchodna Łužica. Druha jedna wo zwjazanosći socialistiskeje politiki z bulowym sportom. Dokelž so wopisowanje awtora de facto z něhdyšej serbskej a němskej kónčinu, mjeńšinowej identitu a prašenjemi wokoło tuchwilneje pólskeje mjeńšinoweje politiki zaběra, měnimy, zo so hodźi, tutoho reportera Serbam předstajić. Lukáš Novosad je so z nim rozmołwjał.
Do naju rozmołwy sće mje překwapił, hdyž sće so za to zajimował, kak je koparski klub Baník Ostrava z čěskeje Šleskeje hrał. Za njón so mjenujcy jako Polak z Katowic zajimujeće. Kak tomu?
