Rozmołwa z architektom Hanušom Härtelom, kotrehož swójba w Čěskej hižo w štwórtej generaciji serbuje

Hanuš Härtel je architekt a bě předsyda Towarstwa přećelow Serbow w Praze. Za swój čas je so za to zasadźował, zo je so towarstwo po sydom lětach přestawki lěta 2009 zaso do Serbskeho seminara nawróćić směło. Tón raz pak rěčimoj wo jeho swójbje a poćahu k serbšćinje. Wšako Härtlec swójba wot Druheje swětoweje wójny w Čěskej bydli a hižo w štwórtej generaciji tam serbuje. Kak tomu? Wo tym je so Lukáš Novosad z nim rozmołwjał.

Twoja mać je Čechowka a twój nan Serb, štož rěka, zo sy po połojcy Serb.

Štož mojeju staršeju nastupa, je to prawje. Štož mje nastupa, njejsym so ženje jako napoł Serb abo napoł Čech začuwał, ale sym prosće Serb a Čech. Wobě identiće stej mi bliskej.

Twój dźěd bě so rozsudźił w Čěskej wostać, potajkim sy ty třeća generacija wašeje swójby, kiž je z Łužicy preč. Pola mnohich emigrantow so maćeršćina hižo w druhej generaciji zhubi a woni rěč noweho stata přiwozmu. Ty pak serbuješ. Kak tomu?