Hišće je dosć časowych swědkow, kotřiž so na wječory bjez telewizora dopominaja, na rozmołwy w sćinje swěčkow při ćopłej pjecy w kuchni. Su swojim staršim, dźědam a wowkam při ručnym dźěle přihladowali a wuknyli, smědźachu so tež raz sami wuspytować. Najdlěši čas sedźachu žony při kołwróće abo spjelnjachu dalše ručne dźěła, mjeztym zo mužojo koše plećechu, saki reparowachu abo chošća wjazachu. Dobri přewodźerjo běchu při tym stawiznički ze zašłosće, často wo wójnskich podawkach a tradanjach hač k najnowšim wjesnym powěsćam, mjeztym zo spěwachu abo grog pijachu.