Štóž je lońšu schadźowanku w Budyskej Krónje wopytał, dopomina so snano na skutkowne wołojnikowe rysowanki ze serbskimi motiwami. Tehdy je mjez druhim 20lětna Chróšćanka Lisa- Maria Cyžec, sobudźěłaćerka Serbskich Nowin, prěni raz swójsku wuměłsku seriju zjawnje wustajała. Hižo w dźěćatstwje hraješe wuměłstwo wulku rólu w jeje žiwjenju. Jako mała holca wona rady rysowaše. Wuměłstwo bě wot zakładneje šule jeje najlubši předmjet. Wosebje wobwliwowana bu wot swojeho dźěda: „Swojeho dźěda sym přeco prosyła, zo by mi pokazał, kak so kóń rysuje. Talent mam najskerje wot njeho a swojeho nana“, Lisa-Maria powěda. Fascinacija za zwěrjeće rysowanki – wosebje za konje – ju dołho přewodźeše a markěrowaše započatk jeje rozpalitosće za wuměłstwo. Za Lisu-Mariju je tute hač do dźensnišeho wažne wurunanje k wšědnemu dnjej. „To je kaž medicina“, wopisuje wona kreatiwny proces. „W času rysowanja wšitko wokoło sebje zabudu.“ W běhu lět wuwiwaše swójski stil, kotryž jako dźěl swojeje identity zrozumi – wědźo, zo smě so tón dale měnjeć.