Je angažowanych ludźi w zjawnym serbskim žiwjenju, kotřiž pola druhich prašenje budźa: Kak woni to wšo zdokonjeja, štož widźimy? A runje přikład Kathariny Jurkoweje pokazuje, zo móžeš při tym wjele wjesela měć.

Wjetšina našich čitarjow drje Katharinu Jurkowu najdlěje jako regionalnu rěčnicu Domowiny za teritorij župy „Michał Hórnik“ znaje, wšako funkciju hižo wot lěta 2009 wukonja. Jeje powołanska biografija je so jako přistajena serbskeho młodźinskeho towarstwa PAWK započała, doniž njebu projektna sobudźěłaćerka za rěčny marketing w Rěčnym centrumje WITAJ (RCW). Za nowe wužadanje w serbskim třěšnym zwjazku je so Katharina Jurkowa tehdom samo dočasnje z maćerneho dowola wróćiła.