Pućuješ-li na němsko-čěskej mjezy, potom njemóže so šmóratko ženje prawje rozsudźić, hač ma ći skerje němsku abo čěsku syć poskićeć. Po puću w „Kamjenjowym zwěrjencu“ pak syć stajnje zaso trjebaš. To smój na wuprawje minjenu srjedu pytnyłoj. Po něhdźe sydom kilometrow dołhej čarje njeměł so mjenujcy cyle bjez pomocy šmjatać. Hižo na parkowanišću při Hajnikowym domje w Lückendorfje informuje wulka tafla wopytowarjow sprěnja wo koncepće pućowanskeje šćežki, a zdruha tež wo online-přewodźe.
Z pomocu mjenowaneje wosebiteje aplikacije wjedźe wuměłska figura Freda pućowarjow po zwěrjencu. Zhromadnje z njej móža sej zajimcy zajimawostki formacijow kamjenjow wotkrywać. A tak móžachmoj sej tež mój na někotrych formacijach kamjeniskow wobrysy wšelkich zwěrjatow derje předstajić. Prěnje tajke běše šubut. Doniž pak sej k njemu njedoběžachmoj, wuhladachmoj na dalokej pastwje wulke stadło wowcow. Tež krasny wuhlad z liščeje łakańcy (Fuchskanzel) nam puć wolóži.








