Jutře wječor skónči so za słónčneho krala ze serbskeho kraja regentstwo. Stefan Šmit je so z princom rozmołwjał.
Knježe princo, Waše lěto na čole Kulowskich norow so nachila. Kajke běše Waše regentstwo?
Čas jako princ bě přewšo přemóžacy a jedyn wjeršk honješe přichodny. Bě to telko zaćišćow, zo sym po popjelnej srjedźe najprjedy raz něšto dnjow trjebał, doniž njejsym wšitko předźěłał. Móžeš rjec, zo sy jako princ kusk kaž prominentny. Maćerje powědaja swojim dźěćom při nakupowanju, zo je tam princ. Abo w pěstowarni, hdźež moja žona Lydija dźěła, smój jenož hišće princ a princesna. Na to dyrbiš so najprjedy raz zwučić. Po tym zo su naju jako princowski por zjawnosći předstajili, je namaj tójšto swójbnych, přećelow a znatych swoju pomoc poskićiło. Bě rjenje widźeć a dožiwić, kelko je naju w tutym času podpěrało – hač z wulkimi abo małkimi akcijemi. Za wšitko to smój woprawdźe wšitkim jara dźakownaj.








