Iran hrozy susodam z wjećbu
Washington (dpa/SN). Jordaniska, Zjednoćene arabske emiraty, Sawdi-Arabska a Katar nochcedźa USA při móžnej wojerskej wjećbje přećiwo Iranej podpěrować. Tole rozprawjeja medije w USA. Štyri kraje, w kotrychž maja USA wojerske zepěranišća, su knježerstwu we Washingtonje zdźělili, zo njesmědźa USA a Israel jich powětrowy rum za ofensiwne operacije přećiwo Iranej wužiwać. Iran hrozy wšitkim arabskim krajam nimo toho z wjećbu, kotrež nadpad Israela podpěruja.
Wjace podpěry pěstowarnjam
Berlin (dpa/SN). Kwalitu pěstowarnjow w Němskej chcedźa polěpšić. Zwjazkowy sejm je za to wčera nowy zakoń wobzamknył, kotryž wot januara płaći. W nim je rjadowane, zo Zwjazk krajam přichodnej lěće stajnje dwě miliardźe eurow za lěpše zastaranje w pěstowarnjach přewostaji. Tak chcedźa wjace kubłarkow a kubłarjow přistajić, wosebje na zapadźe Němskeje. Tam trjebaja hač do lěta 2030 něhdźe 90 000 nowych sobudźěłaćerjow.
Zelenskyj po puću w Europje
Hurrikan „Milton“ je w zwjazkowym staće USA Floridźe ...
Starosća so wo wěstotu wojakow
Tel Aviv/New York (dpa/SN). Po wobtřělenju hłowneho zepěranišća misije UNO w Libanonje starosća so přiběrajcy wo wěstotu wojakow UNO, kotřiž noša módre nahłowniki. Tole rjekny nawoda měroweje misije Jean-Pierre Lacroix w Bjezstrašnostnej radźe UNO w New Yorku.
Israelscy wojacy běchu po informacijach UNO zepěranišćo wobtřěleli. Při tym so wojakaj zraništaj. Israelske wójsko milicy šiitow Hisbollah wumjetuje, zo wokolinu zepěranišća za swoje zaměry znjewužiwa. Najebać strach chcedźa wojacy UNO w Libanonje wostać. Misija UNO dohladuje pomjeznu kónčinu mjez Israelom a Libanonom hižo lětdźesatki dołho. Wjace hač 10 000 wojakow z 50 krajow so na tym wobdźěli.
Zakaz AfD skerje dwělomny
Berlin (dpa/SN). Wobydlerjo Němskeje su w prašenju móžneho zakaza AfD přez Zwjazkowe wustawowe sudnistwo pačeni. Skupina zapósłancow zwjazkoweho sejma je wotpowědnu próstwu zestajała, kotruž chcedźa na sudnistwje w Karlsruhe zapodać. 42 procentow wot sćelaka ARD woprašanych ludźi maja zahajenje procesa k zakazej AfD za přiměrne, 46 procentow tole wotpokazuje. Přirunujo z februarom je podźěl přiwisnikow zakaza wo pjeć procentow přiběrał.
W jednotliwych politiskich stronach je wobraz rozdźělny: 69 procentow přiwisnikow Zelenych a 58 procentow sympatizantow SPD by zakaz AfD witało. Mjez přiwisnikami CDU/CSU je podźěl ze stajnje 46 procentami wurunany. Mjez přiwisnikami BSW (55 procentow) a AfD (95 procentow) přesahuje měnjenje, zo njeje zakaz AfD scyła trjeba. Politisku stronu w Němskej zakazać je přewšo wobćežne. Prawniske zadźěwki su chětro wulke.
Israelske lětadła Beirut atakowali
Nobelowe myto japanskej organizaciji
Oslo (dpa/SN). Japansku měrowu organizaciju Nihon Hidankyo wuznamjenjeja lětsa z Měrowym Nobelowym mytom. Organizaciju počesća z tym tež za jeje zasadźenje na dobro swěta bjez atomowych brónjow a za to, zo z pomocu swědkow časa stajnje zaso demonstruje, zo njesmědźa so tajke brónje nihdy wjace zasadźić. Tole je norwegski Nobelowy komitej dźensa w Oslu zdźělił. Dotal njejsu organizaciju hišće docpěli, zo móhli ju wo wuznamjenjenju informować, komitej při wozjewjenju lětušeho lawreata zdźěli.
W času konflikta na Bliskim wuchodźe, wójny w Ukrainje a dźesatkow dalšich namócnych konfliktow na swěće njebě so lětsa jasny faworit za Měrowe Nobelowe myto wotbłyšćował. Nominowali běchu 286 kandidatow, mjez nimi 197 wosobinow a 89 organizacijow. To bě jasnje mjenje hač minjene lěta. Mjena nominowanych Nobelowy komitej hižo 50 lět tradicionalnje jako potajnstwo chowa.
Loni bě w Iranje zajata wojowarka za prawa a runoprawosć žonow Narges Mohammadi myto dóstała.
Kritizuja rentowe plany
Zwjazkowy zličbowanski zarjad starosća so wyšich wudawkow stata dla
Berlin (dpa/SN). Zwjazkowy zličbowanski zarjad rentowe plany zwjazkoweho knježerstwa raznje kritizuje. Wosebje postorkuje so zarjad na trěbnych připłatkach ze zwjazkoweho etata. „Tutón wulki přidatny engagement Zwjazka chowa w sebi wulke strachi. Zwjazkowy zličbowanski zarjad warnuje w tym zwisku znowa před pjenježnym přećeženjom Zwjazka wulkeje financneje potrjeby rentoweho zawěsćenja dla“, pisaja pruwowarjo zličbowankow w stejišću za słyšenje fachowcow w zwjazkowym sejmje přichodny tydźeń, kiž nowinarjam předleži.
Plany zwjazkoweho knježerstwa su w prěnim rjedźe na dobro nětčišich rentnarjow a lětnikow, kotrež bórze na wuměnk woteńdu. Młodźi ludźo maja widźomne njelěpšiny. Sprawnosć mjez generacijemi njeje tak hižo data“, zarjad kritizuje.
