Wšelake reakcije na namócnosće w sprjewnym měsće

Budyšin (SN/MkWj/JaW). Najnowše namócnosće w Budyšinje iniciatiwu Serbski sejm starosća a ju pohnuwaja so na zjawnosć wobroćić. Přiběracej namocy dyrbi so nuznje wobarać, rěka w nowinskej zdźělence iniciatiwy. Socialne a politiske konflikty maja so na demokratiske wašnje rozrisać! Kóždejžkuli nacionalizm a wumjezowanje wućek pytacych ludźi – hač přez Orbána, Le Pen abo Petry – móža Serbja jenož wotpokazać, dokelž su přez lětstotki sami pod tym ćerpjeć dyrbjeli. „My so distancujemy, hdyž sej někotři němscy (snadź Drježdźanscy) organizatorojo demonstracijow žadaja: ‚Budyšin wostanje němsko-serbski. Přećiwo žołmje ćěkancow w Budyšinje!‘ Při tym spytaja Serbow znjewužiwać a instrumentalizować. Runje prócowanja wo skrućenje samopostajowanja Serbow nas zawjazuja,­ artikl 1 Zakładneho zakonja wobkedźbować: „Dostojnosć kóždeho čłowjeka je njezranliwa.“ Zastupjerjo iniciatiwy tohodla poskićeja – je-li trjeba –, so na demokratiskim rozrisanju konfliktow wobdźělić.

Sobu najnaročniše wubědźowanje płunowych balonow su minjenu nóc w porynskim Gladbecku startowali. Cyłkownje 26 dwuwosobowych mustwow z dwanaće krajow je wobdźělenych. Woni wostanu wjacore dny w powětře, zo bychu telko kilometrow kaž móžno zmištrowali. Rekord 3 400 kilometrow běchu lěta 2005 w USA nastajili.

14lětny je w Kölnje z awtom nana před policiju ćěkał. Zastojnikam bě njewěste wašnje jězdźenja napadnyło. Jako chcychu wóz kontrolować, hólc na płun stupi a smaleše bjez swěcy po měsće. Po někotrych kilometrach pak so wón dalšeje honjeńcy­ wzda. Policisća přepodachu jeho maćeri. Klučiki awta bě sej 14lětny skradźu wzał, jako nan spaše.

Jutře před 25 lětami zahajichu so nadpady na wukrajnikow we Wojerecach

Wojerecy (dpa/SN/at). „Skinojo dom wukrajnikow nadpadnyli.“ Z krótkopowěsću běchu Serbske Nowiny 19. septembra 1991 wo tym informowali, štož je so jutře před 25 lětami we Wojerecach stało a štož běše započatk sydomdnjowskeho wuwzaćneho stawa, kaž powěsćernja dpa tele dny we wobšěrnym zhladowanju piše. Tehdy dósta so wosom wopitych skinheadow z třomi vietnamskimi wikowarjemi cigaretow na Łužiskim naměsće do włosow. Dźěše wo zapłaćenje, tuž policija zakroči. Rozestajenja přepołožichu so na Schweitzerowu před dom zrěčenskich dźěłaćerjow. Z kóždym dnjom hida na ludźi z Mosambika a Vietnama rozrostowaše runje tak kaž syły, kotrež so před jich kwartěrami hromadźachu a přećiwo nim hewrjekachu. Policija bě z přidatnymi jednotkami z Budyšina, Kamjenca a Zhorjelca na městnje. 19. septembra lětachu palne sadźby, kotrež móžachu zhašeć. „Nimale 600 Němcow a něhdźe 200 wukrajnikow je so štwórtk wječor we woprawdźitych nadróžnych bitwach roze­stajało“, pisachu Serbske Nowiny wo tymle dnju. 21.

Montreal (dpa/SN). Komisija EU a Kanada stej po informacijach zwjazkoweho hospodarskeho ministerstwa wotewrjenej za to, zrěčenje wo swobodnym wikowanju Kanady z Europskej uniju Ceta prawnisce zawjazliwje wujasnić. Zwjazkowy minister Sigmar Gabriel (SPD) a kanadiski premier Justin Trudeau rozjima­štaj w Montrealu hódnotu dalšich na Ceta so złožowacych namjetow nastupajo škit inwesticijow, prawa dźěłopřijimarjow a zjawne posłužby.

Železnica znjezbožiła

Veľký Meder (dpa/SN). Při znjezboženju železnicy w Słowakskej bu znajmjeńša 35 ludźi zranjenych, třo z nich ćežko. Spěšnik bě dźensa na železniskim přechodźe blisko města Veľký Meder do nakładneho awta zrazył a z kolijow skočił, kaž powěsćowy sćelak T3 rozprawja, powołujo so na zasadźenske mocy. Wohnjowa wobora dyrbješe lokomotiwnika z kabiny wuswobodźić, na čož jeho helikopter do kliniki dowjeze.

Za runostajenje dźěći