Teltow (dpa/SN). Braniborski zwjazk ratarjow plany lutowanja zwjazkoweho knježerstwa wotpokazuje a budu po nowym lěće přećiwo skrótšenjam protestować. „Jónu hornc přeběži“, rjekny prezident zwjazka ratarjow Hendrik Wendorff powěsćerni dpa. Zwjazkowe knježerstwo chce ratarjam dawkowe lěpšiny pola ratarskeho diesela šmórnyć, zo by deficity w etaće wurunało. Wendorff rjekny: „Dyrbimy z konjacymi zapřahami po polach jězdźić?“ Ratarjo nimaja alternatiwy k dieselej. „Njeznaju žanu syčomłóćawu, kotraž elektrisce jězdźi.“ Ratarjo su na sylne dieselowe mašiny pokazani.

Němski zwjazk ratarjow planuje wot 8. januara protesty přećiwo lutowanskim planam. 15. januara chcedźa so na wulkej demonstraciji w Berlinje zeńć. Tež transportne předewzaća so wobdźěla. Při wšěm chcedźa so ratarjo z politikarjemi dale rozmołwjeć a jim wuwědomić, zo dyrbja ratarjo tež druhdźe tójšto na so wzać. Šmórnjenje dawkowych wolóženjow pola diesela by ratarske zawody přerěznje 5 000 eurow wob lěto płaćiło.

Zo bychmy woprawdźe konsens docpěli, dyrbimy so najprjedy sprawnje a wotewrjenje ze swojimi wšelakimi perspektiwami rozestajeć. W Serbach drje wšitcy wo konsensu rěča – hač Domowina, Serbski sejm abo druzy. Ale faktisce dźe wo to, pod hesłom „Žanu zwadu prošu!“ kóždu kontrowersu wobeńć. Bjesada pak debatu njenaruna. To na tym widźimy, zo knježi hladajo na wulke serbske temy hižo lětdźesatki duchowna stagnacija. Jenički pseudokonsens je, zo so mjez sobu na pokoj wostajamy, zo nichtó nikomu do kału njełazy. Hłowna wěcka, zo spěchowanske pjenjezy za wšě koniki dosahaja. Jeli chcemy na samsnej runinje ze wšěmi europskimi ludami žiwi być, trjebamy tež „wulke debaty“, kotrež zhromadne dalewuwiće inspirěruja. W tutym konteksće je „serbska debata“ poskitk, wjac nic. Smy swobodni ludźo w swobodnym kraju – štóž chce sobu činić, njech to čini; štóž nochce, njech tohorunja čini, štož so jemu chce. Marcel Brauman

60 lět bjez jězbneje dowolnosće po puću był je muž w Jendźelskej. Policisća su jeho při kontroli na awtodróze njedaloko sewjerojendźelskeho Prestona lepili. Zastojnikam pokaza muž prastary a dawno wotběžany certifikat, kotryž jemu dowola, z přewodnikom w awće po puću być směć. Nětko dyrbi šofer ze sudniskej skóržbu ličić. Dotalny rekord bě druhi muž loni nastajił: Wón sedźeše 70 lět bjez jězbneje dowolnosće za wodźidłom.

Dwě promilej alkohola w kreji měješe 36lětna wodźerka wosoboweho awta, jako takle wopita w vogtlandskim Auerbachu do parkowaceho awta zrazy. Kaž policija zdźěli, bě žona na napřećiwny bok jězdnje zajěła a tam do awta a do płota prasnyła. Wona so snadnje zrani. Pomocnicy ju ambulantnje zastarachu. Wěcni škodu zražki trochuje policija na nic mjenje hač 28 000 eurow.

Freiburg (B/SN). Křesćenjo mjenowachu hodowny štom spočatnje paradizowy štom, kiž symbolizowaše wućěrjenje Hadama a Jěwy z paradiza. We wšěch kulturach a nabožinach jewi so štom jako symbol žiwjenja a trajna zeleń jako symbol wěčneho žiwjenja. Wot 19. lětstotka so hodowny štom wot adwenta do Swěčk Marije doskónčnje w Europje přesadźi.

Zbožopřeća bamžej

Vatikan (B/SN). K 87. narodninam bamža Franciskusa gratulowachu njedźelu, 17. decembra, mnozy zastupjerjo cyrkwje, politiki kaž tež knježny socialneje stacije swjateje Marty a sto maćerjow ze swojimi dźěćimi, kotrež so tam zastaraja. Statny prezident Sergio Mattarella dźakowaše so bamžej Franciskusej za jeho wobstajne prócowanje „wo měr na swěće a wo postupne wróćenje runowahi mjez čłowjekom a přirodu“.

Hody w Ukrainje