Dwě ćěle zastajencow našli
Gaza/Tel Aviv (dpa/SN). Nimale šěsć tydźenjow po nadpadźe islamistiskeje Hamas na Israel su wojacy njedaloko chorownje Shifa w Gazaskim pasmje dwě ćěle zastajencow namakali. Mortwu 65lětnu su w pódlanskim twarjenju chorownje našli, do Israela dowjezli a identifikowali, israelske wójsko zdźěla. Žonu běchu při zahubnym masakru w Israelu z pomjezneje wsy Beeri zawlekli. Dźensa rano je wójsko zdźěliło, zo su njedaloko chorownje dalše ćěło wuhladali. Smjertne powostanki 19lětneje wojakowki su mjeztym w Israelu identifikowali. Přičinu smjerće njejsu zdźělili.
Při wojerskej akciji w najwjetšej chorowni Gazaskeho pasma su israelscy wojacy po swójskich informacijach centralu Hamas w pincy twarjenja wuslědźili.
Zakoń na dobro hospodarstwa
Berlin (dpa/SN). Zwjazkowy sejm je dźensa naprawy na dobro wuwića hospodarstwa Němskeje wobzamknył. Tak mjenowany zakoń za wjace šansow hospodarstwu, kiž je amplowa koalicija zdźěłała, předwidźi dawkowe wolóženja na dobro předewzaćow hač do lěta 2028 a pospěšene procesy dowolnosćow. Pjenježne wolóženja wučinjeja kóždolětnje sydom miliardow eurow.
Centralny dypk je premija za inwesticije za škit klimy. 15 procentow wudawkow zawodow za naprawy k zwyšenju energijoweje eficiency chcedźa jako připłatk direktnje přinošować. Nimo toho planuja dawkowe wolóženja, zo bychu krizojty bydlenjotwar wožiwili. Tež přidatne dawkowe impulsy na dobro slědźenja su w programje zaplanowali. Małym a srjedźnym předewzaćam chcedźa přistup k pjenježnym wikam wolóžić. Zwjazkowa rada ma zakoń hišće schwalić. Mjez zwjazkowymi krajemi zbudźa plany knježerstwa kritiku, dokelž chcedźa jim a komunam dwě třećinje dawkoweho wolóženja nabrěmjenić.
Rěč jako riziko
Dźěłarnistwo wo zawod wojuje
Fürstenwalde (dpa/SN). Dźěłarnistwo za twarstwo, energiju a chemiju nochce so z planami wotnamakać, po kotrychž chcedźa twornju zhotowjerja wobručow Goodyear na wuchodźe Braniborskeje zawrěć. Tak chcedźa protestne akcije zahajić a zwjazki za zachowanje produkcije wobručow w Fürstenwaldźe organizować, dźěłarnistwo wčera zdźěli, po tym zo běchu plany nastupajo zawrjenje wozjewili. 24. nowembra planuja akciski dźeń před zwjazkowym financnym ministerstwom w Berlinje. Nimo toho krajnu a zwjazkowu politiku namołwjeja, wo industrijne dźěłowe městna w Fürstenwaldźe, Fuldźe a wšudźe druhdźe w Němskej wojować, sej dźěłarnistwo žada.
Zhotowjer wobručow Goodyear chce produkciju w swojej tworni w Fürstenwaldźe skónčić. Předewzaće z hłownym sydłom w hessenskim Hanauwje je wčera připowědźiło, zo produkcija wobručow w tutym zawodźe hač do kónca 2027 wuběži. Po dotalnych planach 750 dźěłowych městnow wottwarja. Zawod w Fürstenwalde ma 930 přistajenych. Jeničce wotrjad za měšenje gumijowych maćiznow ma dale dźěłać.
Swětłowa instalacija wobkuzłuje
Tepjenja dale a moderniše
Drježdźany (dpa/SN). Podźěl sakskich domjacnosćow z modernym tepjenjom přiběra. Tole zwěsća dźensa wozjewjeny wuslědk přepytowanja „Kak tepi Němska?“ w nadawku zwjazka energijoweho a wodoweho hospodarstwa Němskeje. Podźěl tepjenjow, kotrež su po tutym woprašowanju pjeć lět abo młódše, wučinja w swobodnym staće mjeztym 23,3 procenty. Lěta 2019 bě to jenož 13,8 procentow. Runočasnje je podźěl wosebje starych tepjenjow z wjace hač 25 słužbnymi lětami wot 16,5 na 28,2 procentow rozrostł. W přerězku su tepjenja w sakskich bydlenjach 14,6 lět stare (2019: 16,6).
W třećinje wšěch bydlenjow wužiwaja ludźo přidatne tepjenja. Wosebje woblubowane su kaminy (40,4 procenty). Slěduja drjewowe a peletowe tepjenja (20,2 procentaj) a wuhlowe kachle (18,6 procentow). Zwjazkowe knježerstwo SPD, Zelenych a FDP chce so ze zakonjom nastupajo energiju twarjenjow a z komunalnym ćopłotnym planowanjom wo to postarać, zo je tepjenje w Němskej přichodnje klimje přichileniše. Při tym chcedźa wolijowe a płunowe tepjenja z modernymi připrawami narunać.
Achim Mič dalši rekord docpěł
Serbski krosnowar z přećelemi wjeršk swjećił
Achim Mič – znaty serbski krosnowar, pućowar a dyrdomdejnik ze Sulšec pola Kulowa – zmištrowa minjeny kónc tydźenja swój posledni wjeršk w Sakskej Šwicy. Po tym zo steješe jako prěni Serb na 8 035 metrow wysokej horje Gasherbrum II, je so jemu po 52 lětach skónčnje poradźiło, sej na wšěch 1135 wjerškow w Połobskich pěskowčinach zalězć. Dotal je to hakle něhdźe 350 krosnowarjow zmištrowało.
To a tamne (17.11.23)
Z wjace hač 80 rynkami hula-hoop wokoło bjedrow je Berlinjanka Dunja Kuhn w Drježdźanach swój dotalny swětowy rekord přetrjechiła. Dotal nawjedowaše wona w tutym žanru ze 70 rynkami. Při nowym pospyće rekorda dyrbješe wona rynki na znajmjeńša třoch městnach ćěła wěsty čas dźeržeć, štož žadaše sej wjele mocy. Na wčerawšim dnju Guinnessowych rekordow su po wšěm swěće spytali, dotalne rekordy přetrjechić.
Paducham w swojim bydlenju z mobilnym telefonom originalnje přihladować móhł je muž w Lipsku – a je policiju wołał. Třo paduši běchu so namócnje do bydlenja zadobyli a je přeborkali, jako nichtó doma njebě. Awtomatiska kamera jich wobkedźbowaše. Policija paduchow w starobje 28, 31 a 39 lět hišće we wochěži zaja. Sudnik je mjeztym rozsudźił, zo dyrbja do přepytowanskeje jatby.
Železnica z nuzowym planom
Berlin (dpa/SN). Warnowanski stawk Dźěłarnistwa lokomotiwnikow Němskeje GdL je po wšej Němskej wupady ćahow zawinował. „Nuzowy jězbny plan Němskeje železnicy je po planje a stabilnje zaběžał“, zdźěli železnica dźensa rano. Plan předwidźi, zo jenož 20 procentow wšitkich hewak planowanych ćahow jězdźi. Warnowanski stawk GdL běchu wčera wječor zahajili. Wón ma hač do dźensa 18 hodź. trać. GdL žada sej mjez druhim 555 eurow wjace wob měsac.
Biden a Xi Jinping so zbližiłoj
San Francisko (dpa/SN) USA a China chcedźa swój napjaty poměr polěpšić a nawjazaja po dlěšej přestawce zaso kontakt mjez wójskomaj wobeju krajow. Prezident USA Joe Biden a chinski statny a stronski šef Xi Jinping staj so wčera njedaloko kaliforniskeje metropole San Franciska prěni króć po dobrym lěće zaso wosobinsce zetkałoj. Krizowe posedźenje traješe dlěje hač štyri hodźiny. Biden rěčeše po tym wo „kostruktiwnej a produktiwnej rozmołwje“ ze chinskim statnikom.
Rozšěrja zhromadne dźěło
