Pomoc měli přiwzać
Kóžda wosada w serbskim pastoralnym rumje ma samostatna wostać, je biskop Drježdźansko-Mišnjanskeho biskopstwa Heinrich Timmerevers wčera wobkrućił. To je dobra powěsć, wšako je to esencielne za zdźerženje serbskich nabožnych tradicijow w jednotliwych wosadach. Kóžda wosada wšako ma swoje tradicije, wobrjady atd., štož měło so w přichodźe zachować. Derje je, zo je wón jónkrótnosć kóždeje serbskeje wosady spóznał.
Nimo toho chce biskop kooperaciju mjez wosadami wutworić. Koncept serbskeho pastoralneho zwjazka, hdźež so zarjadniske nadawki za wšitke serbske wosady wobdźěłuja, je dobra podpěra duchownym, kotřiž maja potom zaso wjace chwile za dušepastyrske nadawki. Duchowni měli tuž pomoc přiwzać, wšako je to wolóženje. Tuchwilu maja fararjo přiběracych zarjadniskich nadawkow dla wjele dźěła a mjenje chwile za naležnosće wěriwych we wosadźe. Marta Měrćinkec
Wěstotu polěpšili
Drježdźany (dpa/SN). Něhdźe pjeć lět po zadobyću do historiskeho Zeleneho wjelba su nětko nowe wěstotne naprawy w Drježdźanskej statnej zběrce wuměłskich twórbow zarjadowane. Zamołwity za to je sydom wosobow sylny team, kotryž podawki w muzeju wobkedźbuje a hódnoći. Centrala je stajnje wobsadźena, tak zo móža w padźe nadpada abo zadobyća spěšnje reagować a policiju w běhu sekundow alarměrować.
Polacy blokuja přechod mjezy
Waršawa (dpa/SN). Pólscy transportni předewzaćeljo blokuja ukrainski pomjezny přechod Dorohus. „Mjeza je zawrjena“, piše organizator Rafał Mekler internetnje. Předewzaćeljo žadaja sej wobmjezowanje tunjeje konkurency z Ukrainy, kotraž je po jich měnjenju hłownje za woteběrace wobroty branše zamołwita.
Do toho bě wobwodne sudnistwo w Lublinje wukaz regionalneho zarjadnistwa zběhnyło, kiž chcyše protestnu akciju zakazać. Po informacijach organizatorow smě wotnětka hodźinsce jedne nakładne awto mjezu přeprěčić. Wojerske jězdźidła, humanitarne transporty, busy, čerstwe žiwidła a transporty zwěrjatow su wuwzate.
Pólske wozydłownistwa běchu hižo kónc lěta 2023 wjacore pomjezne přechody do susodneho kraja blokowali. Do wudyrjenja ruskeje wójny přećiwo Ukrainje transportowaše kraj najwjetši dźěl swojich tworow přez morjo. Nětko transportuja wšitko z nakładnymi awtami. W praksy pak přijědźe wulki dźěl ukrainskich awtow prózdnych do Pólskeje, zo bychu tam transportne nadawki přewzali. To kóncuje pólskim předewzaćelam eksistencu.
To a tamne (13.05.25)
Samlutki do lěsneje kupjele doběžała je třilětna holčka w Gmündenje nad Mohanom w delnjej Frankskej. Sobudźěłaćerjej dźěćo napadny. Po informacijach policije je holca dwaj kilometraj daloko nóžkowała a přez wotewrjene wrota do kupjele přišła, kotraž njebě za nowu sezonu ani hišće wotewrjena. Krótko po policiji je tež mać dźěsća dojěła, zo by holčku njezranjenu zaso sobu domoj wzała.
Wjace wopytowarjow hač wobydlerjow zličili su w Italskej: Tam je loni na wšěch 60 milionow hosći turistiske zajimawostki kraja wopytało. To je wjace hač ma kraj wobydlerjow. Na čole steji Kolosej w Romje z nimale 15 milionami wopytowarjemi. Sćěhujetej galerija mólbow Uficije w Florencu a antikske město Pompeji, kotrež bu něhdy z woporom wudyrjeneho wulkana. Turisća su statnej kasy 382 milionow eurow wobradźili.
Snadny zajim
Köln (B/SN). Wjetšina Němcow so lědma za wólby noweho bamža zajimuje. Po naprašowanju instituta YouGov mjez 2 048 ludźimi so jeničce 11 procentow „jara“ za wólby zajimuje, 59 proc. „scyła nic“. 16 proc. naprašowanych je sej Europjana jako bamža přała, 10 proc. Afričana a 4 procenty Aziata. Třećina ludźi wočakuje, zo nowy bamž wumocowanja ze stron zastupjerjow cyrkwje wujasni a so sylnišo chudym a słabym wěnuje.
Dalša financielna podpěra
Berlin (B/SN). Nabožno-politiski rěčnik frakcije SPD Lars Castellucci praji ewangelskej powěsćerni, zo płaćenja stata w nowej legislaturnej periodźe nješmórnu. Wšitke 16 krajow bě zastajenje běžnych statnych financielnych přiražkow přez jónkrótne wotnamakanje wotpokazało. W přichodźe su statne dojednanja předstajomne, zo hodźeli so cyrkwinske twary wuchować, měni Castellucci.
Zamołwitosć za přichod
Zniža mjezsobne cła
Genf (dpa/SN). China a USA su so w swojej wikowanskej zwadźe na to dojednali, mjezsobne cła znižić. Kaž ze zhromadneje deklaracije wuchadźa, płaći dojednanje najprjedy raz 90 dnjow. Po tym zniža USA cła na chinske importy na 30 procentow, dotal wučinjachu wone 145 procentow. China zniži cła na importy z USA wot 125 na dźesać procentow. Delegacije wobeju krajow běchu w Genfje wuradźowali. Wotnětka chcedźa zhromadny gremij załožić, w kotrymž wo hospodarstwje a wikowanju wuradźuja.
Zwada rentowych přinoškow dla
Berlin (dpa/SN). Nowa ministerka za dźěło a socialne Bärbel Bas (SPD) dóstawa podpěru swojeje strony za namjet, zo měli tež zastojnicy přinoški do zakonskeho rentoweho zawěsćenja płaćić. To je zasadna pozicija socialnych demokratow, rjekny socialny fachowc Bernd Rützel nowinarjam. Zwjazk zastojnikow Němskeje namjet wotpokazuje, tež koaliciski partner CDU/CSU namjet kritizuje. Lěwica a socialne zwjazki jón witaja.
Trump potuńša lěki
We wopomnišću bywšeho koncentraciskeho lěhwa w Mauthausenje su ...
Saskia Esken hižo njenastupi
Berlin (dpa/SN). Předsydka SPD Saskia Esken chce so swojeho zastojnstwa wzdać. Wona na zjězdźe strony kónc junija hižo k nowowólbam předsydy njenastupi, zdźěli 63lětna wčera wječor w sćelaku ARD.
„Mějach minjenych šěsć lět wulke wjeselo a wulku česć, SPD jako předsydka nawjedować směć“, Esken rjekny. Strona je starosławna a tola žiwa a młoda. „Zastojnstwo předsydki pak nětko złožu, zo bych wobnowjenje strony zmóžniła.“ Wona chcyła wosebje žony do sobudźěła pohnuć. Esken je wot lěta 2019 předsydka SPD. Tehdy běchu ju čłonojo strony direktnje wolili, spočatnje z Norbertom Walterom-Borjansom. Naposledk pak běchu ju přiběrajo kritizowali.
Chorobne kasy z minusom
Bamž sej žada: Nihdy wjace wójna!
Rom (dpa/SN). Nowy bamž Leo XIV. je swoju prěnju zjawnu modlitwu na Pětrowym naměsće w Romje za měrowy apel po wšěm swěće wužił. Z balkona katedrale swjateho Pětra nawoda katolskeje cyrkwje před tysacami přiwisnikow namołwješe: „Nihdy wjace wójna!“. Prěnjeho pontifeksa z USA, dotalneho kardinala Roberta Francisa Prevosta, stajnje zaso ze sylnym přikleskom přetorhnychu.
Swjaty wótc dopominaše na kónc Druheje swětoweje wójny ze 60 milionami smjertnych woporow před 80 lětami. Tohodla chcył so wón runja swojemu předchadnikej Franciskusej „na wodźacych politikarjow swěta z namołwu ‚Nihdy wjace wójna‘ wobroćić“.
Runočasnje žadaše sej bamž „sprawny měr“ za Ukrainu, přiměr w Gazaskim pasmje na dobro ciwilneje ludnosće a pušćenje wšěch israelskich zastajencow. Po trochowanju policije bě so na Pětrowym naměsće w Romje něhdźe 100 000 ludźi zhromadźiło. 69lětneho misionara a nawodu rjada awgustinow běchu minjeny štwórtk za 267. bamža wuzwolili.
