Kašć z ćěłom bamža Franciskusa su předwčerawšim, sobotu, we ...
Nowy nalět Israela na Beirut
Beirut (dpa/SN). Israelske wojerske lětadła su wčera wječor twarjenje na kromje libanonskeje stolicy Beirut bombardowali. Tam běchu po informacijach israelskeho wójska pječa rakety Iranej přichileneje milicy Hisbollah składowane. Tole rani dojednanje mjez Israelom a Libanonom, w Tel Avivje zdźělichu.
Do nadpada lětadłow bě Israel wobydlerjow potrjecheneje kónčiny w arabskej rěči warnował. Po informacijach z Libanona njeje při nalětach nichtó žiwjenje přisadźił. Wěcna škoda pak je jara wulka. Bě to mjeztym třeći nadpad israelskeho wójska na Beirut po wotzamknjenju přiměra w Libanonje minjeny nowember. Na juhu Libanona bu wčera wodźacy funkcionar Hisbollah z trutom morjeny.
Trump Zelenskeho přeswědčił
Washington (dpa/SN). Ukrainski prezident Wolodymyr Zelenskyj móhł po posudku prezidenta USA Donalda Trumpa při měrowym dojednanju z Ruskej zwólniwy być, so połkupy Krim wzdać a swoju dotalnu poziciju z tym zasadnje změnić. Tole je Trump ze Zelenskym pječa na zetkanju w Romje wobrěčał. Na prašenje žurnalistow, hač je Zelenskyj zwólniwy Ruskej połkupu přewostajić, Trump rjekny: „Myslu sej, zo haj.“
Trump bě so sobotu na kromje pochowanskeje swjatočnosće za zemrěteho bamža Franciskusa skrótka ze Zelenskym zetkał. Po tym Trump ruskemu prezidentej Wladimirej Putinej wumjetowaše, zo njeje tón chutnje na měrje zajimowany, a hrožeše Ruskej ze sankcijemi.
Němska 70 lět z čłonom NATO
Brüssel (dpa/SN). Ze swjatočnym zarjadowanjom su dźensa w Brüsselu přistup Němskeje k NATO před 70 lětami wopominali. Na ceremoniju we hłownym sydle wojerskeho zwjazka wočakowachu mjez druhim zwjazkoweho prezidenta Franka-Waltera Steinmeiera a amtěrowaceho zakitowanskeho ministra Borisa Pistoriusa (SPD). Na swjatočnosć bě generalny sekretar NATO Mark Rutte přeprosył.
Zwjazkowa republika bě 6. meje 1955 jako 15. čłon transatlantiskemu zakitowanskemu zwjazkej přistupiła.
Trajaca wójna Ruskeje přećiwo Ukrainje a njewěsty přichod NATO běštej na zarjadowanju prezentnej temje. Zwjazk je tuchwilu we hłuboko sahacym procesu změny. Hłowna přičina toho je wotpohlad USA, so zamołwitosće za wěstotu Europy krok po kroku wzdać. Europscy čłonojo maja tole za nastork, so masiwnje wobrónić a wjace pjenjez za zakitowanje wudać.
Zo njewotměje so swjatočnosć 6. meje, ma terminowe přičiny. Tón dźeń chcedźa w Berlinje nowe knježerstwo spřisahać.
Merz: Jara dobre mustwo
Unija CDU/CSU předstaja swojich ministrow koalicije – SPD hišće čaka
Berlin (dpa/SN). Dobry tydźeń do wuzwolenja Friedricha Merza za zwjazkoweho kanclera Němskeje stej CDU a CSU dźensa popołdnju swoje mustwo za nowe knježerstwo předstajiłoj. Nimo toho CDU na małym stronskim zjězdźe koaliciske zrěčenje z SPD schwali. Bayerska CSU je tole hižo činiła. Socialdemokraća maja hišće hač do jutřišeho chwile, po puću čłonskeho wothłosowanja wo koaliciskim zrěčenju wothłosować. Předsydu CDU Friedricha Merza chcedźa 6. meje za noweho zwjazkoweho kanclera wuzwolić.
Po koaliciskim zrěčenju přewozmje CDU sydom z cyłkownje 17 ministerstwow, runje tak SPD. CSU ma tři ministerstwa nawjedować. Prěnje personalije buchu wčera hižo w rozprawach medijow přeradźene, bjez toho zo by to něchtó wobkrućił. Merz rěčeše na małym zjězdźe CDU wo „jara dobrym knježerstwowym mustwje“. Sakski ministerski prezident Michael Kretschmer (CDU) hižo znatych nowych ministrow tohorunja chwaleše. „To je so Friedrichej Merzej woprawdźe derje poradźiło“, rjekny Kretschmer nowinarjam.
Quo vadis medicina?
Digitalne fota dale problem
Lipsk (dpa/SN). Krótko do přestajenja na digitalne fota pola wupokazow abo pućowanskich pasow 1. meje bědźa so někotre sakske komuny dale z komdźenjemi při přestajenju systema. Po nowym rjadowanju móža ludźo próstwu wo nowy wupokaz jenož hišće z digitalnym fotom zapodać. We wjacorych komunach Sakskeje pak pobrachuje za to prosće trěbna technika.
Město Šwikawa je po swójskich informacijach nowu techniku sčasom skazała. Na postajenym terminje pak ju zasadźić njemóža, dokelž je dodawanje po cyłej Němskej problematiske. Město tuž žane digitalne pasowe fota na městnje poskićeć njemóže. Tež w Drježdźanach z wuwzaćom někotrych měšćanskich dźělow hišće trěbnu techniku nimaja. Nastroje pak su skazane. Tuž nachwilnje hač do kónca julija hišće papjerjane fota akceptuja. Měšćanske zarjadnistwo zdźěla, zo hišće njewědźa, hdy budu nowu techniku zasadźić móc. Porno tomu su w Lipsku nimale wšitke wobydlerske běrowy přihotowane. Jeničce w dwěmaj wobwodomaj maja hišće problemy. Ludźo měli so zwoprědka informować, na čo dyrbja so nastajić.
To a tamne (28.04.25)
Na zadnim sedle awta je žona wčera rano w Aachenje dźěćo porodźiła. Policistam napadny muž na kromje dróhi, kotryž zastojnikow rozpjeršeny k sebi kiwaše. Žona w awće měješe hižo hrona. Tuž zastojnikaj awto wobeju do přichodneje chorownje přewodźeštaj, ignorujo při tym błyskače. Dźěćo pak měješe nuzne a so hišće na parkowanišću před chorownju narodźi. Lěkarjo chorownje spěšnje pomhachu. Žona a dźěćo stej strowej.
Rozžohnowanje nježenjenca je w Drježdźanach zasadźenje policije a helikoptera zawinowało. Zakuklenaj běštaj 38lětneho na parkowanišću namócnje do awta tykłoj a z nim do směra na Pirnu wotjěłoj. Swědkojo hnydom policiju zazwonichu, kotraž pytansku akciju zahaji. Hodźiny pozdźišo namakachu „zawlečeneho“ w Radebeulu na swjedźenju. Wobdźěleni dyrbja akcije dla z chłostanku ličić.
Trump atakuje Harvard
Washington (dpa/SN). Prezident USA Donald Trump je elitowej uniwersiće Harvard „wohroženje demokratije“ wumjetował. Harvard je antisemitiska a lěwicarsko-radikalna institucija, pisa Trump na swojej internetnej platformje Truth Social. Liberalna uniwersita „dowola wěstej skupinje kołwrótnych, hidu a hněw rozšěrjeć“, wón twjerdźi. Na campusu běchu wjacore demonstracije na dobro Palestinjanow organizowali. Na to bě Trump statne srědki za kubłanišćo blokował.
„Ně“ SPD njeby drama było
Berlin (dpa/SN). Z wida předsydy dorostoweje organizacije SPD Philippa Türmera njeby žadyn drama był, bychu-li čłonojo SPD koaliciske zrěčenje z CDU/CSU wotpokazali. „Nichtó uniji a SPD njezakazuje, so hišće raz dorozumić“, rjekny Türmer nowinarjam. „To njeby žana statna kriza była.“ Dobrych 358 000 čłonow SPD ma hišće hač do 29. apryla składnosć, wo koaliciskim zrěčenju z uniju wothłosować. Čłonojo dorostoweje organizacije SPD su zrěčenju napřećo přewšo skeptiscy.
Žane wěčne zastaranje wjace
