Koparskej wubrance Argentinskeje a Francoskeje postaraštej so wčera wo jedyn z najbóle napjatych finalow w stawiznach swětoweho mišterstwa. Po 3:3 w 120 mjeńšinach přewinychu Južnoameričenjo Francosku hakle w třělenju jědnatkow. Lionel Messi krónuje z tym swoju karjeru z titulom pola WM. 35lětny bě sylnych Argentinjanow z jědnatku k nawjedowanju wjedł (23.). Krasnje přez Messija a Mac Allistera wuhraty konter přetwori Di María při dołhej žerdźi k 2:0 (36.). Argentinska měješe dołho wšitko w ruce, wot Francoskeje přińdźe w ofensiwje mało. Jako bě partija nimale hižo rozsudźena, docpě Kylian Mbappé najprjedy přez jědnatku přizamknjenske wrota (80.) a dwě mjeńšinje pozdźišo samo hru hišće wuruna. 2:2 bě zdobom kónčny staw po regularnym hrajnym času. W podlěšenju trjechi potom zaso Messi (109.), prjedy hač Mbappé dwě mjeńšinje do kónca znowa přez kop z jědnaće metrow wuruna. Finale swětoweho mišterstwa móžeše so jenož hišće w třělenju jědnatkow rozsudźić. Superstaraj činještaj započatk. Najprjedy bě to Mbappé, kotryž Emiliana Martíneza ­přewiny, potom Messi přećiwo Hugo ­Llorisej wuruna.

Wolejbulowe mustwo Sokoła Budyšin měješe spočatk a srjedź hodownika swój druhi respektiwnje třeći hrajny dźeń we wokrjesnej klasy, stafla wuchod. W njesměrnje harowatej a zymnej hali w Słónkecach běštej towarstwje z Hnašec-Dobruše a Schönbacha přećiwnikaj. Prěnju hru doby domjace mustwo z Hnašec přećiwo Schönbachskemu z 2:0. Po tym witachu hosćićeljo Sokołow na hrajnišćo. W prěnjej sadźbje mějachu hrajerjo z města hišće z halowymi wuměnjenjemi činić, hrajachu njekoncentrowani a zwrěšćichu přeco zaso z nadaćemi. Sadźba skónči so z 25:16. Druhi přechod bě lěpši, tak zo měješe serbske mustwo dołho nadźiju na dobyće. Ale na kóncu tež tu njekoncentrowanosće, na přikład w bloku, napřećo wuspěchej dźěłachu. Sadźba skónči so z 25:21 za Hnašecy-Dobrušu.

Awtor dźensa

André Strelow

Cirkus koparskeho swětowyeho mišterstwa je so wčera zakónčił. Finale w Katarje bě dramatiske, drje najlěpše wšěch kónčnych hrow, kotryž sym hdy widźał. Superstaraj Messi a Mba­ppé poskićištaj fantastisku partiju. Z wothwizdanjom finala skónči so runočasnje najdwělomniše swětowe mišterstwo w stawiznach kopańcy. Plan organizatorow je so zešlachćił. Rjane wobrazy rjanych stadijow, horliwych fanow, a to předewšěm z Argentinskeje a Marokka, su wulki zaćišć zawostajili. Wjace hač 200 miliardow eurow je Katar płaćić dyrbjał, zo by wuměnjenja za štyri perfektne tydźenje wutworił. Mjenje hač dźesać procentow toho běchu dotalni hosćićeljo jedneje WM zapłaćili, kajka to błudnosć. Dawaše pak tež ludźi, kotřiž w t-shirtach z barbami tučele chodźachu. „Women. Life­. Freedom“ (žony, žiwjenje, swoboda) steješe na trikotach ludźi, kotřiž protestowachu za zmužite žony w Iranje a přećiwo mordarskemu režimej. Bohužel pak rady widźane njeběchu. Nošerjo buchu wot policije rigoroznje chłostani.

Budźe so hrać?

Hladajo na špatne poměry steji před přewjedźenjom kóždeje koparskeje hry wulki prašak. Wažne je, zo so do toho hišće raz w socialnych syćach informujeće.

17.12.  13:00  Biskopičanske KT –

  VfB Kśišow

17.12.  13:00  Budissa Budyšin –

  SV Westerhausen

18.12.  13:00  FC Energija Choćebuz –

  BSG Chemija Lipsk

18.12.  13:00  ST Radwor –

  ST Horni kraj-Sprjewja

Serbska wubranka trenuje

Serbska koparska wubranka młodźiny D trenuje póndźelu wot 16 hodź. do 17.30 hodź. we Worklečanskej sportowej hali. Tam přihotuje so wona na januarski halowy koparski turněr w Mišnu.

Wolejbulowy turněr PAWKa

Serbske młodźinske towarstwo PAWK wuhotuje pjatk, 23.12., zaso swój tradicionalny wolejbulowy turněr, a to w sportowej hali w Radworju. Přizjewjenja su na Facebookstronje PAWKA móžne abo na Instagram. Maksimalnje 12 cyłkow smě sobu hrać, w kóždym mustwje smětaj jenož dwaj aktwinej wolejbulistaj zasadźenaj być. Turněr započnje so we 18 hodź., hala je wot 17 hodź. wotewrjena a jeli so mustwo hač do 17.30 hodź. přizjewiło njeje, smě narunanski cyłk nastupić. Startowy pjenjez wučinja 10 €.

Wotběhanje hodowneje husycy