Z wukonamisu spokojom
W druhej połojcy hrajneje doby 2017/2018 je dorostowe mustwo blidotenistow Viktorije Worklecy dotal dobry wobraz zawostajiło. Młody cyłk z tójšto nowymi wobličemi je drje ze štyrjoch hrow jenož jeničku dobył, postup pak je pola kóždeho wočiwidny.
Nimo hižo tři a poł lěta aktiwneho Benjamina Grutki wosebje tež nowačk Lucas Friedland z Chrósćic přeswědča. Jeho lěpšina je, zo móže doma ze swojim nanom, kiž je tohorunja aktiwny blidotenist pola Viktorije, přidatnje zwučować. Tež Jurij Čornak z Hrańcy, Jerome a Laurence Lehmann z Worklec a Marija Rječkec z Pěskec su na so skedźbnić wědźeli a tón jedyn abo tamny dypk za mustwo dobyli. Na swój prěni dypk resp. na prěnje zasadźenje čakataj hišće Titus Kubitz z Miłoćic a Maximilian Krawc z Pančic-Kukowa. Snano so jimaj to w jednej z poslednjeju hrow poradźi. Worklečanski cyłk nastupi hišće přećiwo mustwomaj z Njeswačidła a Kamjenca. Přećiwo Njeswačanam su prěnju hru 6:8 snadnje přěhrali. Wuslědk chcedźa nětko wobroćić spytać. W Kamjencu je serbska šestka 9:5 dobyła a chce to wězo znowa.
Pančičanki doma dwójce podleželi
Marijine hwězdźički – MSV Budyšin 04 2:3 (25:16, 15:25, 15:25, 25:22, 13:15)
Na poslednim domjacym hrajnym dnju sezony 2017/2018 su volleyballistki ST Marijineje hwězdy dwójce podleželi. W prěnjej hrě přećiwo MSV Budyšinej 04 njedosahachu jim mocy hač do kónca, zo móhli hru za sebje rozsudźić. Po suwerenym starće a jasnym sadźbowym dobyću slědowaštej sadźbowej poražce 15:25. W štwórtej Marijine hwězdźički hišće raz wšitke mocy mobilizowachu a ju z 25:22 dobychu. Rozsudny tiebreak bě wurunany, ale mocy a koncentracija popušćachu; wone jón přěhrachu a tak partiju.
Marijine hwězdźički – Módro-běłe
Wojerecy 0:3 (22:25, 17:25, 23:25)
W druhej partiji dominowachu wot spočatka Wojerowske volleyballistki. Někotre dobre fazy domjacych, na přikład přez wosebje sylne nadaća a jednotliwe spěšne nadběhi, polěkowachu tomu, zo Pančičanki wotstawk skrótšichu. Tola njetrjebawšich zmylkow w přiwzaću kaž tež w nadběhu dla so Pančičankam njeporadźi ani jeničku sadźbu dobyć.
Jasna wěc za hosći ze srjedźneje Łužicy
Rakečanske ST – LSV Nowe Město nad Sprjewju 0:5 (0:2)
Za domjacych zasadźeni: Glöckner, Langer – Brosam, Wetzorke, Bejma, Schidun, Zschippang, Prochnow, Hrjehor, Nowotny, Biesold, Kral, Koker, Mwape, Wenzel, Suchy.
Za hosći zasadźeni: Wikolajczuk – Paszlinski, Pereira Rodrigues, Fallant, Gamla, Schneider, de Souza Barros, Liebe, Dolbin, Antkewitz, Kazadi-Leonowic, Panoscha, Lohr.
Na kumštnym trawniku w Kamjencu nastupi wokrjesny koparski wyši ligist z Rakec přećiwo zastupjerjej krajneje klasy, mustwu z Noweho Města. Přihotowanska partija móhła so tež mjezynarodna mjenować, wšako bě wosebje za hosći ze srjedźneje Łužicy tójšto koparjow z wukraja zastupjenych, a to z Pólskeje, Konga a samo Brazilskeje. W Rakečanskim mustwje kopaštaj z Feliksom Hrjehorjom a Fabianom Bejmu Serbaj, a sudniski kolektiw běše samo ryzy serbski. Matijas Kral ze Smjerdźaceje duel suwerenje a měrnje nawjedowaše, jemu poboku běštaj asistentaj Jan a Kilian Hrjehor z Róžanta. Wšitcy třo dožiwichu měrny wječor, dokelž hraješe so nimale bjezwuwzaćnje na wrota Ronnyja Glöcknera a Sebastiana Langera.
Test wuspěšnje wobstali
SV Bannewitz – SJ Chrósćicy 3:4 (2:2)
Zestawa hosći: Stein – L. Zahrodnik (46. Šiman), Cyž, Sentiwan, M. Zahrodnik, Henčl, Runt (72. Šołta), Žur, G. Zahrodnik, Młynk (72. Löschau), Němec
Sobotu podachu so koparjo prěnjeho mustwa Chróšćanskeje SJ na poslednju testowu hru zymskeje přestawki. Přećiwnik rěkaše SV Bannewitz, tohorunja z krajneje klasy.
Worklečenjo z předskokom dobyli
PJATY wólnočasny volleyballowy turněr serije „top-šěsć“ skónči so w Ralbičanskej hali z dobyćom Viktorije Worklecy před wučerjemi Serbskeho gymnazija Budyšin (SGB) a Žołto-módrymi Kulow. Po ptačokwasnym volleyballowym turněrje srjedź januara w Kulowje dojědźe sej šěsć wólnočasnych mustwow minjeny štwórtk do Ralbic, zo bychu přewjedli 5. turněr z mjenom „Witamy nalěćo“. Wutrobny dźak słuša hosćićelej, abiturnemu lětnikej 12/96, za wuběrny přihot a wotběh wubědźowanja. Tón njeměješe tónraz najsylnišu zestawu k dispoziciji a wobsadźi 6. městno. Dypk wjace měještej mustwje z Radworja a Chrósćic na konće. Při wuličenju małkich plusowych dypkow běchu Chróšćenjo ći lěpši. ST Radwor nastupi znowa z najmłódšimi hrajerkami a hrajerjemi, mjez kotřiž běchu třo aktualni gymnaziasća a jedyn bywši. W prěnjej sadźbje pokazachu Radworčenjo přećiwo swojim wučerjam SGB z 11:6 solidny wukon. Druhi přechod 9:10 snadnje přěhrachu.
Lodohokejowy turněr w Rumburku
Jenož hišće tři stafle
Zamołwići Serbskeho Sokoła su w Budyskej Serbskej kulturnej informaciji přidatne wulosowanje přewjedli, dokelž bě Sokoł Budyšin, zakitowar volleyballoweho pokala Domowiny, připrajenje za lětuši 36. turněr zaso wotprajił. Losowanska sonina bě sobudźěłaćerka SKI Marija Swierczekowa. Ze štyrjoch staflow nastachu tři. Tu nětko nowa zestawa:
Stafla A
Bratrowstwo Róžant, Serbski gymnazij-wučerjo, Škit Budyšin, Mustwo 1296, Jěcharki a jěcharjo Pančicy
Stafla B
11./12. lětnik SGB, Smešomłóćawa, SGB MIKS 10./11. lětnik, SJ Chrósćicy, Skupina brodatych
Stafla C
Serbski dom Budyšin, Swobodny los, Handicap, Rapaki, Synojo Pančic
Jurij Bjeńš
Lětsa na čas njehraja
Přichodnu sobotu, 10. měrca, přewjedźe Serbski Sokoł w Budyskej sportowej hali na Třělnišću 36. sokołski volleyballowy turněr wo pokal Domowiny. Z rěčnikom Serbskeho Sokoła Janom Hrjehorjom je so Jurij Bjeńš rozmołwjał.
Najprjedy dwanaće přizjewjenych cyłkow, po tym 14, při wulosowanju 16, nětko 15 – přihoty za 36. nakład sokołskeho volleyballoweho turněra wo pokal Domowiny runjewon optimalne njejsu ...
J. Hrjehor: Hladajo na zašłe turněry bě to poprawom přeco tak, zo dyrbjachmy stajnje zaso na změny reagować. Nimamy pak z tym problem. Turněr njeje za wobdźělnikow žane winowatostne zarjadowanje. Smy derje přihotowani. Wjeselimy so, zo mamy nětko 15 cyłkow a nadźijamy so, zo tež wšitke přijědu.
Sće so rozsudźili město ze štyrjomi w třoch staflach hrać (hlej wulosowanje).
J. Hrjehor: To bě trjeba, dokelž je Sokoł Budyšin, zakitowar pokala, wobdźělenje wotprajić dyrbjał. Jedna stafla z třomi mustwami njeby optimalne rozrisanje było.
Powěda so, zo njebudźeće lětsa na čas hrać, ale chceće wšitke partije bjez wulkeho ćišća wuhrać ...
Škit Budyšin je mnohim faworit na sokołskim volleyballowym ...
Njedawno wulosowachu čłonojo Serbskeho Sokoła kaž tež koparski trenar Tomaš Henčl skupiny za Sokołski volleyballowy turněr wo pokal Domowiny, kotryž budźe 10. měrca w sportowej hali na Budyskim Třělnišću. Napjeće hrajerjo na njón čakaja, wšako wuličeja sej hižo prěnje šansy, kak daloko móhli přińć. Jurij Bjeńš, sam hrajer mustwa Bratrowstwo Róžant, je so mjez akterami naprašował.
Beno Šołta z Miłoćic: Kaž nimale přeco hrajemy z Bratrowstwom Róžant tež lětsa zaso přećiwo Škitej Budyšin. Duel je so minjene lěta na wěčny dwubój wuwił, tohodla sym na njón jara wćipny. Dale sym wjesoły, zo nastupimy w skupinje hišće přećiwo wučerjam Serbskeho gymnazija a Mustwu 12/96. Tam tójšto přećelow sobu hraje, a tohodla budźetej tež to rjanej hrě. Mojej faworitaj stej Škit Budyšin a Handicap Pančicy – z Róžantom pak bych zaso rady raz w finalu stał.
Widźał, słyšał, napisał (05.03.18)
Poprawom nochcych w póstnym času žane słódkosće chłóšćić. Sprawnje pak přiznawam, zo sym so toho předewzaća poměrnje spěšnje wzdał. Zo pak bych swojemu ćěłu tola něšto dobreho popřał, předewzach sej kóždy dźeń znajmjeńša poł hodźinki sportować. Pozitiwny pódlanski efekt je tón, zo při sportowanju stajnje něšto dožiwješ.
Sibirske temperatury minjeny tydźeń ćehnjechu nas na lód. Tak smy tydźenja cyłe popołdnjo na Kamjentnym haće za čornym pukom honili. Lód bě jara kruty a nimale tak hładki kaž w hali – perfektne to wobstejnosće. Puk pak bě tak spěšny, zo so hač do rohodźe na kromje suny a so tam chowaše. Runje na tych městnach pak bě lód přećeńki a tuž móžno njebě jón tam zaso wotewzać. Mandźelska sobuhrajerja wšak měnješe, zo so jej to poradźi. A woprawdźe. Móžachmy bórze zaso lodohokej hrać, ale hakle po tym zo bě wona cyle přemokana z lódzymneho hata wulězła. Na tym městnje hišće raz wutrobny dźak za angažowane zasadźenje a runočasnje wuběrnu show.
