FC Łužica Wojerecy
– Sokoł Ralbicy/Hórki 2:3 (1:1)
Zestawa hosći: Gloxyn – Lulak, Schultz, B. Bjeńš, von Köding, Šołta, S. Bjeńš, Bejma (59. M. Kurjat), Wałda, Korjeńk, G. Kurjat
Pokal ma swójske zakonje! Tale štučka je najskerje tak stara kaž pokal samy. Koparjo Sokoła Ralbicy/Hórki móža wo tym nětko dalšu podawiznu powědać. Jězba wjedźeše jich k Łužicy Wojerecy, hdźež we wulkim stadionje nastupichu. Ralbičenjo běchu wězo faworit, byrnjež domjacy na dobrym 2. městnje we wokrjesnej lize stali. Po dźesać mjeńšinach třěli Sokoł 1:0. Šołta bě mócnje do dołheho kuta trjechił. Jenož pjeć mjeńšin pozdźišo ležeše bul znowa w saku. Gabriel Kurjat bu do haski pósłany a połoži bul pódla wrotarja, kotryž Wałda přez liniju storči. Pobóčny sudnik pak rozsudźi na jara dwělomnu nimohru. W dalšim hrajnym času wustupowachu hosćo z mócnym pressingom a wudobychu sej tak wjele bulow. Poslednja preciznosć pak agilnemu Šołće stajnje pobrachowaše. Kaž z ničeho Wojerowčenjo w 42. min. wurunachu. Spěšny Gaede wobkruži von Ködinga a přetwori do krótkeho lěweho kuta.