Łužiske liški Běła Woda – EV Landshut 5:1 (2:0, 2:1, 1:0)
Hra Běłowodźanskich lodohokejistow přećiwo Landshutej běše jara podobna dobyću přećiwo Crimmitschauwej. Přećiwnik z Delnjeje Bayerskeje je wosebje w prěnich 20 mjeńšinach jara derje postupował a by poprawom wysoko nawjedować dyrbjał. Wrota pak poradźichu so domjacym. Wrotar Mac Carruth prosće wšitko dźeržeše a běše znowa wurjadny muž na lodźe. Prěnju prawu składnosć wužichu Liški k nawjedowanju. Jonathon Martin puk wotpopadny, přihra jón Thomasej Reichelej, kiž widźeše hnydom Tomáša Andresa. A Čech suny puk mócnje do krótkeho kuta. Prawy lodohokej pak hrajachu jenož hosćo a nadźěłachu sej šansu po šansy. Tola stajnje běše kónc pola Carrutha. Z ničeho hosćićeljo přez Reichela zwyšichu. Wón hraješe dwójnu přihrawku z Andresom, a w druhim pospyće dósta so puk přez wrotowu liniju.