Pola načolnika wjac móžno było

štwórtk, 18. měrca 2021
artikl hódnoćić
(0 )

Kassel Huskies – Łužiske liški ­Běła Woda 4:2 (1:1, 2:1, 1:0)

Načolnik druheje zwjazkoweje lodohokejoweje ligi Kassel Huskies dyrbješe zranjenjow dla tójšto wustojnych hrajerjow narunać, a tak bě dypk wulki cil hosći. Hladajo na cyłu hru bě tón tež realistiski. Kasselske huskije drje mějachu stajnje wjac hrajnych podźělow, cyle strašni před wrotarjom Mac Carruthom pak jeno zrědka běchu. Hornjołužičenjo stejachu zady jara wěsće, w natwarje pak mějachu ćeže. Tak sej sami tež přewulke šansy njenadźěłachu.

Rozsudnej faktoraj poražki Běłowodźanow běštej dwaj eklatantnej zmylkaj w defensiwje. Tak darichu načolnikej krótko po znowazahwizdanju w srjedźnej třećinje na­wjedowanje 2:1, tu bě hakle 16 sekundow hratych. Hišće njezbožowniše běše z wida hosći mjezystawne 3:2 za Huskije. Te padny wosrjedź fazy, w kotrejž mě­jachu módro-žołći hru poprawom jara derje pod kontrolu.

wozjewjene w: Sport
Prošu přizjewće so, chceće-li komentar podać

nawěšk

nowostki LND