W serbskej literaturje chowaja so mnohe drohoćinki, na kotrež znowa skedźbnić je trjeba, zo njebychu so pozabyli. Wotpowědne impulsy chce awtorka serbskim čitarjam a čitarkam z nowym rjadom „Znowa čitała“ dawać.

Spisowaćelku Marju Młynkowu (1934−1971) sym sej poměrnje pozdźe wotkryła. Jako wuńdźechu jeje knihi „Starosće w dźewjatce“ (1964), „Kostrjanc a čerwjeny mak“ (1965) a „Dny w dalinje“ (1967), běch dźěćo. Hakle kónc 1970tych lět kupich sej, wróćiwši so ze studija, postum wudatu zběrku powědkow „Za płotom“ a přečitach ju. Běch zahorjena.