Njedawno zakónčena wustajeńca w Muzeju Budyšin wěnowaše so starožitnemu rownišću na Wowčej horje w Delnjej Kinje. W tutym zwisku pokaza so z archiwalijemi měšćanskeho archiwa na to, zo so hižo 1826 prěnje namakanki zapisachu. Tehdom zapisachu jich po starym ležownostnym mjenu „In den Lehden“. Tole mje pohnuwa so z tutym ležownostnym pomjenowanjom rozestajić:

Ležownostne pomjenowanje (pólne mjeno) „Lehden“ wotpowěduje staremu serbskemu „lědo“ (delnjoserbsce) resp. „lado“ (hornjoserbsce) za pustu, njepłódnu zemju, štož so wězo z wužiwanjom jako wowče pastwišćo derje hodźi. Za městnostne mjeno Lehde/Lědy w Delnjej Łužicy poda Ernst Eichler w druhim zwjazku knihi „Slawische Ortsnamen zwischen Saale und Neiße“ wotpowědne rozjasnjenja a kedźbliwje na to pokaza, zo wobsteji wobsahowa přiwuznosć k němskemu zapřijeću.