Chwatnej rezoluciji schwalili
Ljouwert (SN/bn). Zhromadźizna delegatow Federalistiskeje unije europskich narodnych mjeńšin, hłowne to zarjadowanje lětušeho 63. kongresa FUEN, je sobotu dwě chwatnej rezoluciji schwaliła. Jednohłósnje zasudźichu zastupjerjo mjeńšin šćuwansku, anticiganistisku narěč noweho italskeho nutřkowneho ministra Matteja Salvinija a wuprajichu so přećiwo wot njeho propagowanemu, wustawje pak njewotpowědowacemu zličenju přisłušnikow mjeńšiny Sintow a Romow. Próstwu běše Němska centralna rada toho ludu zapodała. Nimo toho namołwichu knježerstwo Chorwatskeje, zadźěwać podrywanju a wobmjezowanju mjeńšinowych prawow přez populistiske hibanje, kotrež bě wjace hač 600 000 podpismow za to zezběrało.
Podhladnych zajeli
Paris (dpa/SN). Francoscy fachowcy za bój přećiwo terorizmej zajachu dźesać ludźi, kotřiž su radikalnym prawicarskim kruham přichileni a su pječa atentat planowali. To zdźěli nutřkowny minister Gérard Collomb wčera wječor w Parisu. Po informacijach medijow běchu podhladni nadpad na muslimow planowali. Collomb rěčeše wo zwisku zajatych k „ultraprawicarjam“. Nadrobnosće policija žane njewozjewi. Dlěje hač dwaj měsacaj bě přećiwo mužam slědźiła.
Protest přećiwo planam
Bukarest (dpa/SN). Dźesaćitysacy Rumunow su wčera w Bukaresće a dźesać dalšich městach přećiwo knježerstwu a za njewotwisne sudnistwa demonstrowali. Hłowna přičina je hroženje mócneho šefa knježaceje strony PSD, prawa sudnistwow wobmjezować. Liviu Dragnea, zdobom šef komory zapósłancow, bu minjeny štwórtk našćuwanja k znjewužiwanju zastojnstwa dla k třom a poł lěta jastwa zasudźeny. Dragnea pak so spjećuje, wšě swoje zastojnstwa złožić. Město toho chcył wón z wukazom zakoń změnić a tak chłostanje złahodnić.
Žony nětko za wodźidłom
Zwjazkowy prezident Frank-Walter Steinmeier, Anette Kornek, nawodnica ...
Erdoğan dobył
Zastaranje z piwom zaručene
Merkel: Tójšto dobreje wole
Brüssel (dpa/SN). Najebać wulki nutřkopolitiski ćišć njeje zwjazkowa kanclerka Angela Merkel (CDU) na wurjadnym zetkanju Europskeje unije w Brüsselu žane krótkodobne rozrisanje w europskej zwadźe azyloweje politiki dla docpěła. Mjez wobdźělnikami wjerška pak bě „tójšto dobreje wole“, kaž předsydka CDU wčera wječor rjekny. Hač do wjerška EU přichodny štwórtk chcedźa dale za rozrisanjemi pytać, „a wězo tež po tym“. Hač su krótkodobne rozrisanja z druhimi partnerami EU móžne, wona rjec njemóžeše.
Bayerska CSU žada sej hač do 1. julija cyłoeuropske rozrisanje, zo hodźało so dalepućowanju ćěkancow we wobłuku EU zadźěwać. Nutřkowny minister Horst Seehofer (CSU) hrozy z ministerskim wukazom jednać, njedyrbjała-li so Europska unija dojednać. Potom bychu ćěkancow, kotřiž su hižo w jednym z krajow EU registrowani, na mjezy Němskeje wotpokazali. Merkel to nochce. W poslednjej konsekwency móhła wulka koalicija tutoho problema dla rozpadnyć. Na posedźenje w Brüsselu bě 16 krajow přijěło.
Stare ličby hižo njepłaća
Haćenja na A 4 – wobchadny minister Dulig chce problem rozrisać
Drježdźany (SN/MkWj). Awtodróha A 4 je přewuska – to měni mjeztym tež sakske krajne knježerstwo, po tym zo su zapósłancy sejma hižo wot nazymy 2017 na to skedźbnjeli, zo njeje połoženje hladajo na haćenja a njezboža dlěje znjesliwe. Za wobchad zamołwity hospodarski minister Martin Dulig (SPD) je nětko přizjewił, zo ma so hišće w lěću wutwar awtodróhi na šěsć čarow mjez Drježdźanami a Porchowom a wutwar na wosom čarow mjez třiróžkom Nossen a Drježdźany dodatnje do zwjazkoweho plana wobchadnych pućow zapisać. „Prěnjotnje podate ličby jězdźidłow su so jako njedźeržomne wopokazali“, Dulig rozłožuje. Wosebje poćežowanje přez ćežke transporty je jasnje přiběrało. 9 000 nakładnych awtow je wšědnje wuchodnje Drježdźan na A 4 po puću. Po informacijach nawody Zhorjelskeje policajskeje direkcije Torstena Schultzy bě jich před třomi lětami hišće 1 600 mjenje. Tendenca je dale přiběraca.
To a tamne (25.06.18)
Titul „najwohidniši pos“ nosy wotnětka jendźelska buldoga „Zsa Zsa“. Dźewjeć lět stare zwěrjo je wubědźowanje „World’s Ugliest Dog“ w kaliforniskim Petaluma dobyło, kaž sćelak ABC7 zdźěli. Wobsedźerka Megan Brainard dósta myto 1 500 dolarow. Cyłkownje 15 psow bě za lětuše wubědźowanje, kotrež mjeztym nimale 30 lět přewjeduja, přizjewjenych. Tam njehódnoća jenož wonkownosće, ale tež charakter štyrinohačow.
Wulka myš je w Indiskej papjerjane pjenjezy w hódnoće 15 000 eurow zežrała, a to w pjenježnym awtomaće. Jako nastroj wjace njefungowaše, jón sobudźěłaćerjo banki wočinichu a namakachu w nim mortwu myš, wobdatu wot lutych roztorhanych pjenjez. Prawdźepodobnje bě so wona přez dźěrku za kable do awtomata zadobyła.
Libanonej pomoc poskićiła
Beirut (dpa/SN). Zwjazkowa kanclerka Angela Merkel (CDU) je na wopyće w Beiruće Libanonej dalšu podpěru Němskeje přilubiła. Zetkanje kanclerki Merkel z ministerskim prezidentom Saadom Haririjom wčera wječor bě „bjezporočne“, rěkaše z kruhow knježerstwa. Wjacenabožinski kraj ćerpi wobydlerskeje wójny w susodnej Syriskej dla. Mjeztym su w Libanonje, kotryž ma runje šěsć milionow wobydlerjow, nimale milion syriskich ćěkancow zaměstnili.
Cła EU nětko płaćiwe
Brüssel (dpa/SN). We wikowanskej zwadźe z USA je Europska unija zhromadnu wotmołwu našła. Wot minjeneje nocy płaća cłostanske cła za ameriske wudźěłki kaž whisky, jeansy, motorske a zemskoworješkowu butru. EU reaguje tak na wot prezidenta USA Donalda Trumpa wukazane cła na europski wocl a aluminij. Mjeztym je tež Indiska produktam z USA chłostanske cła napołožiła.
Bombu dyrbja rozbuchnyć
Njepojěduna wjeršk
Budapest (dpa/SN). Wurjadny wjeršk Europskeje unije wo azylowej politice kónc tydźenja w Brüsselu wotměje so bjez krajow Visegrádskeje štyrki Madźarskeje, Pólskeje, Čěskeje a Słowakskeje. „Njepojědźemy“, rjekny madźarski ministerski prezident Viktor Orbán wčera po wjerškowym zetkanju srjedźoeuropskeje skupiny statow z awstriskim zwjazkowym kanclerom Sebastianom Kurzom. Na informelnym zetkanju w Brüsselu, štyri dny do přichodneho prawidłowneho wjerška EU, wočakuja dotal jědnaće krajow, mjez druhim Awstrisku.
Pólski ministerski prezident Mateusz Morawiecki je prezidenta komisije EU Jeana-Claudea Junckera kritizował. Jeho namjety nastupajo ćěkancow su „njezrozumliwe a njeakceptabelne“.
