Choćebuz (dpa/SN). Krajny społnomócnjeny Braniborskeje za naležnosće Serbow, kulturny statny sekretar Martin Gorholt, kaž tež za prašenja Serbow zamołwity fachowy referat ministerstwa za wědomosć, slědźenje a kulturu mataj wotnětka dwurěčne listowe formulary za komunikaciju ze Serbami. Wo tym inform­uje ministerstwo w nowinskej zdźělence. Wone chce po tym puću swoju česćownosć napřećo delnjoserbšćinje zwuraznić, kaž pisaja. Zdobom informuja wo zetkanju Gorholta ze społnomóc­njenymi za serbske naležnosće wjacorych delnjołužiskich wokrjesow a města Choćebuza w tamnišim Delnjoserbskim gymnaziju. Mjez druhim wobjednachu staw přistupa dalšich gmejnow k serbskemu sydlenskemu rumej.

Jerusalem (dpa/SN). Nimale dwaj měsacaj po wólbach w Israelu wutwori ministerski prezident Benjamin Netanjahu nowe knježerstwo. Po wobćežnych jednanjach je ekstremnje prawicarska Strona sydlerjow knježerstwowej koaliciji přistu­piła. Tak ma Netanjahu přewšo snadnu wjetšinu 61 z cyłkownje 120 zapósłancow parlamenta. Zastupnica Strony sydlerjow Ajelet Shaked budźe nowa justicna ministerka. Zakitowanski mi­nister wostanje Moshe Jaalon. Přede­wšěm powołanje Shaked zbudźa kritiku, dokelž bě wona hižo připowědźiła, prawa najwyšeho sudnistwa wobmjezować. Tež měrowy proces z Palestinjanami drje wostanje haćeny, dokelž je knježerstwo ryzy nabožno-prawicarsce wusměrjene.

Praha (dpa/SN). Wjacori rockerojo ru­skeho motorskeho kluba Nócne wjelki su na swojej jězbje do Berlina Prahu doc­pěli. Na tamnišim prawosławnym kěrchowje połožichu wěnc za padłych sowjetskich wojakow Druheje swětoweje wójny, kaž powěsćernja ČTK rozprawja. Při tym dóńdźe k namócnym rozestajenjam mjez přiwisnikami a přećiwnikami Krjemlej bliskich Nócnych wjelkow. Policija dyrbješe zapřimnyć. Dźensa chcyše skupina něhdźe 30 wosobow do Sakskeje dale jěć. Rockerojo chcedźa w Torgauwje nad Łobjom historiske zetkanje sowjetskich a ameriskich wojakow w aprylu 1945 wopominać. Jězba Nócnych wjelkow, kotraž bě so 25. apryla w Moskwje zahajiła, ma so 9. meje w Berlinje skónčić. Tón dźeń wopomina Ruska swoje dobyće nad hitlerskej Němskej.

Berlinske zarjadniske sudnistwo je mjeztym dwěmaj Rusomaj dowoliło, do Němskeje zapućować. Policija bě jeju na Schöne­feldskim lětanišću zadźeržała, mějo jeju za přisłušnikow Nócnych wjelkow. Sudnistwo bě hinašeho měnjenja.

7. meje rano je dwanaće armejow 1. ukrainskeje fronty w Hornjej Łužicy, we wuchodnej Sakskej a na juhu Šleskeje po 550 kilometrow dołhej fronće ofensiwu přećiwo wójsku Schörnera zahajiło. Hižo dźeń do toho popołdnju běchu sowjetscy a pólscy wojacy wokoło Zubornički a Njeswačidła kaž tež w Delanach wobkedźbowali, zo so němske jednotki z městnami na juh wotsaleja. W našej domiznje zwrěšći tak 19. apryla zahajena, zdźěla za Wehrmacht hišće wuspěšna poslednja tankowa bitwa, kotraž bě sej wulke wopory žadała.

Něhdźe 5 000 sowjetskich wojakow bě tule swoje žiwjenje woprowało. Wjace hač 2 000 pólskich bojownikow w njej padny, z nich 26. a 27. apryla něhdźe 350 jeničce w Zejicach a Lejnje, a na 500 Polakow wokoło Kaponicy. Južnje tuteje hory je row za 65 pola Łupoje a Łupjanskeje Dubrawki padłych němskich wojakow. Najmłódši z nich bě 16lětny Lipšćan Siegfried Müller. W Njeswačidle je 85 němskich wojakow pochowane. We Łu­žicy padnjeni Polacy namakachu swój posledni wotpočink na wulkim wojerskim pohrjebnišću na kromje Zgorzeleca.