FC Energija móže tež w třećej lize wobstać
Po chětro jasnym postupje FC Energije ze štwórteje do třećeje profijoweje koparskeje ligi Němskeje bě wšitkim jasne, zo čakaja na Choćebuskim koparjow wyše naroki. Špatneho połoženja financow dla pak njemóžachu so z wulkimi mjenami zesylnić.
Wobmyslenja so spěšnje zminychu, dokelž su hrajerjo FC Energije grandioznje do sezony startowali. Po přeswědčiwym 3:0 k zazběhej doma přećiwo Hansy z Rostocka slědowachu tři dypki we Wiesbadenje a dypk při remisu 2:2 doma přećiwo jara dobrym hosćom z Unterhachinga, a to po zastatku 0:2 Hižo sonjachu někotři wo dalšim postupje do druheje ligi.
Hinak trenar Claus-Dieter Wollitz, kiž prědowaše jim dale bój přećiwo zestupej, a 53lětny měješe prawje. Wšako prezentowachu přichodne duele jězbu dele a horje. Njetrjebawše dypki wotedachu Choćebuženjo w hrach přećiwo cyłkam z Meppena, Münstera a Halle. Na tamnym boku pokazachu pasabelny wukon pola 1860 Mnichowa a w Karlsruhe. Najlěpšej partiji pak poradźištej so hólcam wokoło kapitana Marca Steina při wonkownym dobyću 2:0 pola 1. FC Kaiserslauterna a krótko do hód pola FC Hansy Rostock.
Wuslědki (16.01.19)
Kopańca, 3. liga
Wiesbaden – Aalen2:1 (2:1)
Karlsruhe – Braunschweig 1:1 (0:1)
Würzburg – Osnabrück 1:2 (1:1)
Meppen – Přećeljo sporta Lotte 2:0 (2:0)
1860 Mnichow – Kaiserslautern 2:1 (0:0)
Preußen Münster – Köln 0:2 (0:1)
Halle – Zwickau2:0 (1:0)
Rostock – Choćebuz0:2 (0:1)
Unterhaching – Uerdingen 4:0 (3:0)
Sonnenhof Großaspach – Jena 0:0 (0:0)
1. VfL Osnabrück 20 30 : 15 41
2. Karlsruheski SC 20 34 : 20 39
3. KFC Uerdingen 05 20 26 : 23 37
4. Halleski FC 20 25 : 19 36
5. SpVgg Unterhaching 20 42 : 20 35
6. SV Wehen Wiesbaden 20 37 : 28 30
7. SC Preußen Münster 20 28 : 29 29
8. F.C. Hansa Rostock 20 27 : 30 27
9. TSV 1860 Mnichow 20 30 : 23 26
10. FSV Zwickau 20 25 : 23 25
11. 1. FC Kaiserslautern 20 23 : 30 25
12. FC Würzburger Kickers 20 28 : 25 24
13. Přećeljo sporta Lotte 20 20 : 25 23
14. FC Energija Choćebuz 20 25 : 31 23
15. SC Fortuna Köln 20 20 : 35 23
16. SV Meppen 20 26 : 30 22
17. SG Großaspach 20 16 : 20 21
18. FC Carl Zeiss Jena 20 27 : 37 21
19. VfR Aalen 20 24 : 32 17
20. Eintr. Braunschweig 20 21 : 39 14
Weixdorf piwowy cup dobył
Na tradicionalny piwowy cup běchu sej koparjo Módro-běłych Kulow dalše sydom mustwow přeprosyli. Škoda, zo bě cyłk Dub Rogeńc (pola Choćebuza) wotprajiło. Tuž stajichu Kulowčenjo dwě mustwje. Tež cyłk z Grodka daše dołho na so čakać. Tak rozsudźichu so zamołwići hry skupiny B doprědka sćahnyć. Hraješe so w dwěmaj staflomaj, w kotrymajž kwalifikowaštej so dobyćer a druhi za połfinale. Hrajny čas wučinješe stajnje dwanaće mjeńšin.
Ralbičenjo turněr přećiwo Kulowskej rezerwje zahajichu a z 2:1 dobychu. Tež druhu hru woni za sebje rozsudźichu, jako přećiwo Großröhrsdorfej z 2:0 dalše tři dypki žnějachu. Mustwo z Weixdorfa tohorunja wobě partiji doby, a tak běše jasne, zo cyłkaj do połfinala zaćehnjetej. Jenož pozicija běše njejasna. W poslednjej skupinskej hrě je Weixdorf Sokołow snadnje z 1:0 přewinył.
Koparki Langburkersdorfa wuspěšne na mišterstwach
Wokrjesne halowe mišterstwa žonow je Zapadołužiski koparski zwjazk w sportowni Kamjenskeho Lessingoweho gymnazija z wosom mustwami přewjedł.
Předkoło wuhrachu w dwěmaj skupinomaj, a přihladowarjo dožiwichu wjele rjanych hrow z tójšto wrotami. Prěnje połfinale doby pozdźiši mišter SSV Langburkersdorf přećiwo Hnašecam-Dobruši 1:0, druhe połfinale Liegau-Augustusbad přećiwo Hlinowcej.
Zaměstnjenske duele skónčichu so takle: hra wo 7. městno Zeleno-běłe Bukecy – TSV 1859 Wjernarjecy 0:1
hra wo 5. městno Wojerowski FC – ST Nadrózna Hrabowka 5:2
małe finale ST Hnašecy-Dobruša – Hlinowski SC 2:1
finale SSV Langburkersdorf – SV Liegau-Augustusbad 2:0. Werner Müller
Kónčna tabulka
1. SSV Langburkersdorf
2. SV Liegau-Augustusbad
3. ST Hnašecy-Dobruša
4. Hlinowski SC
5. Wojerowski FC
6. ST Nadrózna Hrabowka
7. TSV 1859 Wjernarjecy
8. Zeleno-běłe Bukecy
Koparski dorost so wubědźował
Prěnju testowu hru přěhrali
FC Energija Choćebuz
– AC Sparta Praha 0:2 (0:1)
Po napinacym treningowym tydźenju je FC Energija Choćebuz přećiwo AC Sparće Praha testowu hru přewjedła. Tučasny pjaty 1. čěskeje ligi duel přećiwo třećemu ligistej z Němskeje jasnje dominowaše, tež tohodla, dokelž njeměješe Energija wjacorych wustojnych koparjow zranjenja dla k dispoziciji. Tuchwilu pobrachuja jej Fabio Viteritti, Daniel Stanese, Marcello de Freitas, Maximilian Zimmer a Tim Kruse. A wot trenarja Clausa-Dietera Wollitza kruće zaplanowany hrajer U 19 Niklas Geiser bě so tež hišće wotzjewił. Přiwšěm so Choćebužanam poradźi dwaj kompletnej teamaj na hrajnišćo pósłać w kotrymajž bě tež tójšto dorostowych talentow.
W prěnim połčasu njemějachu domjacy před 2 527 přihladowarjemi docyła žanu šansu, po přestawce běchu wotzamknjenja přenjedokładne. Z Liridonom Vocajom prezentowaše so w rjadach FC Energije proband. 25lětny z němsko-albanskim staćanstwom měješe hač do lěća zrěčenje pola Čerwjeno-běłych Erfurt. Nětko chcedźa rozsudźić, hač dóstanje zrěčenje z FCE. Georg Zielonkowski
Dźěćace halowe turněry we Worklecach přewjedźene
Minjenu sobotu je Sportowa jednotka Njebjelčicy we Worklečanskej sportowni koparske turněry młodźiny F, E a D přewjedła. W kóždej starobnej klasy nastupi pjeć cyłkow. Wone wubědźowachu so w modusu kóždy přećiwo kóždemu.
Hłowny organizator bě Krystof Šejda, trenar Njebjelčanskeje młodźiny E. Wulki dźak jemu a wšitkim pomocnikam, kotřiž su so wo wotběh, zastaranje a cyłkownu organizaciju starali.
Na prěnim turněrje wojowachu najmłódše koparki a najmłódši koparjo wo pokale a medalje. Po napjatych partijach a mnohich wrotach zawěsći sej Ralbičanska młodźina F z dźesać dypkami suwerene 1. městno. Slědowaštej mustwje z Chrósćic a Sportoweje jednotki Njebjelčicy. Štwórte městno dźělachu sej Pančičenjo zhromadnje z druhim zastupnistwom Njebjelčanow. Jako najlěpšeho hrajerja wuzwolichu přihladowarjo Fredericka Langu z dobyćerskeho Ralbičanskeho mustwa.
Terminy dumperowcow za wubědźowanja steja
Tež lětsa budu zaso Němske dumperowe mišterstwa, a to po zwučenym wašnju na pjeć wšelakich městnach:
28. apryla Adelsdorf
2. junija Bad Freienwalde
13. julija Baćoń
31. awgusta Drjowk
29. septembra Hórki
Wuslědki (15.01.19)
Tabulki koparskeho dorosta
młodźina B, wokrjesna liga-stafla I
1. HZ Radwor/Wulka Dubr. 7 28 : 4 19
2. ST Horni kraj Sprjewja 7 23 : 4 15
3. Póst Germania Budyšin 7 31 : 6 14
4. HZ Bukecy/Kubšicy/
TSV Wóspork/Hrodźišćo 6 18 : 17 8
5. HZ Huska/Hodźij/Palow 7 13 : 29 7
6. HZ Załom/Wopaka/Wjern. 7 11 : 31 4
7. ST Hnašecy-Dobruša 5 4 : 19 3
8. SZ Wjelećin 6 4 : 22 3
młodźina B, wokrjesna liga-stafla II
1. TSV Połčnica 8 59 : 9 24
2. SC Großröhrsdorf II 8 36 : 11 19
3. FV Ottendorf-Okrilla 8 27 : 14 16
4. ST Kinspork/Łužnica 8 21 : 16 14
5. Hermsdorfske KT 8 16 : 22 9
6. Großnaundorf/Lomnitz 8 14 : 30 9
7. Arnsdorfske KT 8 24 : 37 6
8. FSV Bretnig-Hauswalde 8 15 : 32 5
9. SV Liegau-Augustusbad 8 9 : 50 3
młodźina B, wokrjesna liga-stafla III
1. HZ Kamjenc/Biskopicy 7 75 : 6 19
2. HZ Běła-Cunnersdorf/Natwar Němske Pazlicy 7 37 : 15 15
3. HZ Ćisk/Hory/
HZ Łaz/Běły Chołmc 7 28 : 19 14
4. HZ Jězorina 7 28 : 24 12
5. SV Haselbachtal 7 20 : 31 6
6. HZ Marijina hwězda/SJ Njebjelčicy
7 13 : 41 6
7. TSV Połčnica 7 11 : 31 4
8. Zeleno-běli Sepicy 7 19 : 64 4
Dwanatkarjo SGB abi-cup dobyli
W napjatym finalu abi-cupa přesadźichu so mikswolejbulisća 12. lětnika Serbskeho gymnazija Budyšin (SGB) z 2:1 přećiwo jědnatkarjam SGB mjez wosom startowacymi cyłkami.
Druhi raz přewjedźechu wolejbulisća 11. a 12. lětnika Budyskich gymnazijow kaž tež Powołanskeje šule za techniku a hospodarstwo w tamnišej sportowni abi-cup z měšanymi mustwami. Wurisanje wosom cyłkow, wobstejacych z dweju holcow a štyrjoch hólcow, skónči so z dominancu serbskich šulerjow.
Dwanatkarjo kaž tež jědnatkarjo SGB dobychu wšitke tři partije w swojimaj staflomaj a wuhrachu w finalu swojeho dobyćerja. Wot prěnjeje hač k poslednjej akciji bě hra wurunana a jara powabliwa. W prěnjej sadźbje běchu ći młódši z 15:12 wuspěšni a ze samsnym rezultatom dwanatkarjo w druhej. Woni nawjedowachu w rozsudnym přechodźe hižo ze 14:10, ale jědnatkarjo so wobarachu a na 13:14 skrótšichu. W napjatej fazy poradźi so přichodnym abiturientam trěbny dypk technisce wurjadneje partije k cyłkownemu dobyću.
