W nocy stawać abo tola radšo dale spać? Z tymle prašenjom zaběraja so fanojo lodohokeja wot zašłeje soboty. Po dwanaće lětach přestawki wuhrawa so lětsa mjenujcy zaso lodohokejowy swětowy cup. Dokelž započina so sezona w ameriskej NHL hakle w oktobrje, su samo najlěpši hrajerjo swěta na wulkim evenće pódla. Jan Hrjehor je so ze serbskim lodohokejistom Pětrom Šołtu z Budyšina rozmołwjał.
W sportowych powěsćach čitamy wot soboty wo lodohokejowym turněrje World Cup of Hockey 2016. Hišće ženje wo tym słyšał njejsym.
P. Šołta: 1996 wuhrachu lodohokejisća prěni Swětowy cup, 2004 druhi. Tež lětsa hraje wosom mustwow wo trofeju. Wšitke hry su w kanadiskim AirCanada-centeru Toronto. Nimo faworitow z Kanady, USA a Ruskeje su to Čěska, Finska a Šwedska, potajkim najlěpše teamy swěta. K tomu přińdźetej hišće měšanej cyłkaj. Prěni wobsteji z europskeje wubranki (Team Europa), potajkim europskich krajow, kotrež so ze swójskim krajom na turněrje njewobdźěla. Druhe přidatne mustwo tworja hrajerjo do 23 lět z Kanady a USA (Team North America).