Třeći raz wuhotowa ST Rakecy swój halowy koparski turněr, a to w Radworskej „Slaviji“. Planowane bě, zo wosom mustwow nastupi, bě pak jich jeno šěsć, a to z Rakec z Njeswačidła, Kulowa, Ralbic a Biskopic. Domjacy sami nastupichu z dwěmaj cyłkomaj. Tak hraješe kóždy přećiwo kóždemu stajnje 12 mjeńšin. Biskopičenjo startowachu hnydom z jasnym dobyćom přećiwo Módro-běłym Njeswačidło. Tež mjez Kulowskimi Módro-bě­łymi běše hnydom spóznajomne, zo wěc jara chutnje bjeru. Woni porazychu w prěnjej hrě Rakečansku rezerwu ze 6:2. Sokołske mustwo wobsteješe jeničce z koparjow z Pěskec a Ralbic. Byrnjež někotři wažni akterojo pobrachowali, prezentowachu so woni přećiwo Rakečanam jara wurunani a derje nastajeni. Po zažnym zastatku zwjertnychu hru a dobychu přez wrota Fabiana Korjeńka, Dennyja Gloxyna a samowrota Jakuba Čornaka z 3:1.